الكجم و كرستين .. نار وبنزين
( الكجم وكريستين )
نار وبنزين
( كريستين لاغارد ) دي واحدة من أقوى النساء في أوروبا والعالم إن لم تكن الأقوى …..!!
بتمسك المناصب الأخطر بس
أقل منصب تقلدته هو وزيرة المالية في فرنسا لتكون بذلك أول سيدة أوروبية في السبع الكبار تتولى هذا المنصب ثم مديرة صندوق النقد الدولي وأخيرا هي رئيسة البنك المركزي الأوروبي
اوروبا دي كلها في شنطتا
التقيتها في أحد المؤتمرات الدولية
وفق لقاء مرتب وبعد أن عرفتها بي نفسي قلت ليها بعيداً عن اللقاء معك تلفزيونياً أنت امرأة قوية جداً …وملهمة لنساء العالم ونبدي اعجابنا بك لكن هذا بالطبع لا يؤثر على مجريات الحوار
قالت لي اوووووه ميييرسي …
الفرنسيين ( بدقو ) معاك الفرنسية بس ..حتى لو بعرفو انجليزي بعتزو بيها كدا ……..وكانت هذه الصورة …
دا ما المهم المهم إني اتذكرت ( الكجم ) في موقف كدا كنت حكيتو ليكم في علوب
لما جا ( داني ) ولد التاج من انجلترا وامو انجليزية لزيارة السودان للمرة الاولى
أم التاج دا كانت قالت ليهو ما عافيه منك يا ( التاج ) يا ولدي كان ما جبتا لي ولدك أشوفو بي عيني دي قبل ما ( أموت )
كلمات حاسمة من ( دار الجلال ) والدة ( التاج ) المقيم في بريطانيا منذ عقود وقد تزوج بحسناء إيرلندية انجب منها ( داني ) وانفصلا قبل سنوات طويلة ولا يدري عنها شيئاً
فقد غادرت وتركت له ( داني ) وفتيل ريحة …
ومشط …………وفاتت
( داني ) عمرو ( خمستاشر ) سنة تقريباً لكن شكلو بدي أكبر … فالفتي طويل وفارع ومليان ….!!
زمان أهلو قالو التاج ود دار الجلال عرس ليهو خواجية ( فرسة ) بس ……!!!!
( ياها الرمتو دي )
المهم فعلا عابدين جاب ( داني ) السودان وسط احتفاء الاهل وكونو بس من نسل ( التاج ) ولدم ….
كان ذلك كفيلاً لحظتها بتجاوز كل مافعله ( التاج ) البريطاني نفسو …!!
وداني طبعًا وبحكم هذا الهجين بين الدوري الإنجليزي والسوداني دا شعرو خشن شويه كدا وبني 🧑🦰 لكن طويل ومفلفل …..عاملو ( بوب )
وماخد من لون أمو وأبوهو ….حاجه كدا في النص ( شاي بي لبن ) ……
بس العيون خدر ….لكن ياهن ( شلاليفنا ) …….!!
ومن ضمن برامج الزيارة طلع يلعب كورة مع شفع الحلة ناس الكجم ديل …!!
و( داني ) دا بحب الكورة شديد وهناك في بيتم في إنجلترا معلق ليك صور اللاعبين ديل مالي بيهم أوضتو بشجع ( تشيلسي ) ..وهو ذاتو لعاب والله
المهم أبوهو لبسو قال يتمرن مع شفع الحلة
يازول جا لابس ليك لبسة ( البلوز )
دي بالكحلي كيف والجزمة تلمع والشرابات و ( الشنكار )
( البلبسو تحت الشراب دا ) في أول ظهور ليهو في حلتنا علي الإطلاق ..( الشنكار ما داني )
يمين الجماعة ا تقول جاهم ( نيمار ) والصور دي تتطاقش والسيلفي …!!
ناس ( الكجم ) جو جارين جري بس متابعين ليك الزول دا ….!!
( الكجم ) حايم جنبو يتحكحك ويجرجر في بنطلونو الناصل دا ..ويعاين ليهو سااااكت متكيف
يكشف في الشعر والعيون الخدر دي …..
جا جنبو كدا ….برااااحة قال ليهو …
أدينا قروش ….!! 😳
لاحول ولاقوة الا بالله ….دا شنو يا الكجم ياخ
قروش شنو !؟؟؟؟
( الله يفضحك كان فضحتنا مع الأجانب …)
( المغيرة ) فردتو واقف وتلاته كدا مع المجرم دا يشيلو ويعاينو لي ( داني ) دا ويعاينو لي بعض وميتين بالضحك …
خاصة لما يتكلم إنجليزي … !!
( البليستيشن) دي الليلة جاتم شخصياً
واحد فيهم يعاين لي داني دا ويقلب ( هوية ) 😳😳
اي والله الهوبة الواتاحدة دي 🕺
( الهوبة دي بس ما عرفتها شنو ) 🤔….!!؟
ترحيب باربي ..!! ولا انبساطة ولا شنو …..!!
ماعرفتا والله
بس واضح انهم سعيدين ….!!
ماعارف ليه اتذكرت الكجم لما لاقيت كريستين دي …
في موضوع القروش …غايتو لو كان معاي كان جاب لينا
شحدا ( قرض )
الله يطراهم بالخير ناس الكجم وشفع حلتنا يرجعو بالسلامة ان شاءالله …
وتحياتي للسيدة كريستين ست القهوة …وست الشي كلو
لاغارد دي البترفع اليورو وتنزلو …!!
وانا دستوري نازل في الخرطوم تلاته
وسميري الفي ضميري وييييين سميري …
صحي يا كجمنتو..!!
