مامون أبو شيبة يكتب : قنبلة كردونة

في اليوم الأخير للتسجيلات عندما سحب الهلال أورنيك تسجيل.. حدث جدل شديد بين مشجعي الهلال المرابطين في مكاتب التسجيلات والمتابعين عبر القروبات حول اللاعب الذي سيضمه الهلال..
بعض الحالمين أكدوا إن اللاعب الذي سيضمه الهلال سيكون مفاجأة داوية.. ويمثل القنبلة التي وعد بها الكاردينال.. فاشرأبت الأعناق ونططت العيون وخفقت القلوب ترقباً لقنبلة كردونة..
بعض الحالمين قالوا إن القنبلة تتمثل في ضم (ساماتا) وآخرون قالوا ربما تكون (اساموا جيان)..!!
وبتاعين الإشاعات قالوا إن القنبلة قادمة من أوروبا.. لا هي (جاجا) ولا (سنحاريب) ولا (اميتاب باتشاب) ولا (شاشي كابور)..
قالوا المفاجأة جاية من الدوري الأسباني.. حتة واحدة!!
بعض السذج تساءلوا هل يمكن أن تكون قنبلة الكاردينال والمفاجأة هي (ليونيل ميسي)؟! أو على الأقل (بنزينة)؟!! فالكاردينال سبق أن صرح علناً أنه القروش راقدة عنده زي التراب.. والقروش العند الهلال الحكومة ما عندها.. ولو عاوزين نجيب (ميسي) أو (بنزينة) بنجيبو!!
نط واحد عيونه محمرات وداقسات قائلاً: ساماتا بتاع شنو؟ وميسي شنو؟ علي الطلاق المفاجأة هي (رمضان عجب) مطلب جماهيبر الهلال لكردونة.. وأصلو خطة كردونة ( عشرة مقابل واحد) يعني تسجيل عشرة لاعبين من المريخ انتقاماً من الوصيف الذي هزأ بينا وسجل العقرب!!
هسه كدي احسبوا معانا.. سجلنا من المريخ أحمد ميسي ومحمد عبدالوهاب وحسين محمد وشعبوط والطاهر سادومبا وصالمون جابصون وإبراهيم مشطوب وشرش واوكرا.. ديل تسعة ورمضان عجب هو اللاعب العاشر!!.. كردونة ما بكضب!!
ظهر مشجع هادئ ورزين تبدو عليه مظاهر الواقعية والمنطق قائلاً: انتو خياليين وفرحانين ساكت.. مافي لاعب من اوروبا ولا ساماتا لا عجب ولا رجب.. المفاجأة هي تجنيس النيجيري شعبولا وتسجيل المدافع العاجي (سواليو دابيلا كواتارا)..
مشجع شليق بتاع شمار قال لصاحب المنطق: طيب وين المفاجأة؟ المدافع (دابيرا كاتلانا) كاتلنا وقاعد معانا شهر.. ده ما ممكن يكون مفاجأة.. شفت ليك زول قاعد معاك سنة وتقوم تسجله وتقول دي مفاجأة؟!.. يا أخ المفاجأة هي الحاجة الما متوقعة ولا تخطر على بال أحد.. المفاجأة بتجيك بغتة وتذهلك وتلجم لسانك من الدهشة.. تجي تقول لينا (سواسيو دبارة كاتلانا)؟ هسه عليك الله ده اسم لاعب يقولوا عليه مفاجأة!!
نط مشجع راجل كبير يبدو أنه أكثر واقعية قائلاً: يا جماعة مافي مفاجأة ولا حاجة.. لأنه مافي تجنيس ونحن استنفدنا فرص الأجانب التلاتة.. هسه عندنا شعبولا واوكرا وتيتيه.. نحن عاوزين نسجل مدافع الأبيض بكري بشير تعويضاً لفشلنا في تسجيل المدافع العاجي (كاتلانا)!.. ولو في مفاجأة ياها بكري بشير!!
وفي هذه اللحظة يظهر المدافع العاجي (دابيلا كاتلانا) متوشحاً بالأزرق فينتفض بعض مشجعي الأزرق فرحاً ونطيطاً وكواريكاً!! ويهرولون نحو اللاعب ويحملونه على الأعناق ويهتفون بحياة كردنة..
وتنطلق أصوات: ما قلنا ليكم كردنة ده لو قال بجيب ميسي بجيبو.. ولو قال بجنس بجنس.. وتعلو الهتافات: سواسيو.. سواسيو.. سواسيو.. دابيرا .. دابيرا.. دابيرا.. كاتلانا.. كاتلانا.. كاتلانا..!!
بعض المشجعين ظهر عليهم الإستياء وقال أحدهم هسه عليك الله دي المفاجأة.. نحن كنا منتظرين ساماتا أو الأفضل من ساماتا أو لاعب من أوروبا يجيبوا لينا (الدابيلا الكاتلانا) دي؟!
ويحاول أحد المرافقين للاعب إفهام الجمهور إن اللاعب كاتلانا ما جاي يسجل للهلال.. جاي يسجل لهلال التبلدي.. ويطالبهم بإنزال اللاعب من الأعناق.. ولكن دون جدوى!!
وأخيراً بعد دخول اللاعب لمكاتب التسجيلات وعمل توقيع إبداء الرغبة.. تصل معلومة للجماهير المرابطة بأن اللاعب كاتلانا أبدى الرغبة لهلال التبلدي وليس لهلال أمدرمان!!
ويعود اللغط والجدل وسط الجماهير المرابطة.. ويتردد إن اللاعب الذي سيسجله الهلال اسمه ميسي.. فتنطط العيون من جديد دهشة وفرحة..!!
ويعود المشجع الرزين صاحب المنطق للتحدث وسط الجماهير.. يا أخوانا خليكم عاقلين.. كاتلانا وقع لهلال التبلدي وده معناه التجنيس فشل.. ومعناه في صفقة تبادلية مع هلال التبلدي.. نديهم كاتلانا تخزين.. ويدونا بكري بشير!!
ويبدأ الكثيرون في الإقتناع بحديث صاحب المنطق وأنه مافي مفاجأة.. أو المفاجأة هي بكري بشير..
ويتحول الترقب كله لحضور بكري بشير والتوقيع لهلال كردنة..
يتأخر حضور بكري بشير.. وتبدأ بعض القروبات في التخمين عن موعد حضور بكري بشير للتوقيع والكل على ثقة من توقيعه للهلال..
بعض مشجعي الهلال أمدرمان من أبناء الأبيض يتصلون بمعارفهم في مدينة الأبيض سائلين عن موعد وصول بكري بشير.. فيردون بكري بشير لسه في الأبيض ما سافر الخرطوم..
يبدأ البعض في الإنزعاج لأن الشمس قربت تغيب.. فإذا كان بكري بشير لسه في الأبيض ما بقدر يلحق ويجي الخرطوم لأن السفر بالعربة من الأبيض للخرطوم بالليل بيكون بطئ وقد يستغرق 9 ساعات!!
يتدخل واحدين.. عربية شنو؟ أحمد هارون بجيبه بالتيارة وحيلحق ويسجل.. مافي خوف..
ويحدث هرج ومرج وسط المشجعين: بكري بشير جاء؟.. بكري بشير ما جاء؟.. بكري لسه في الأبيض؟.. بكري بشير بيحصل؟.. التسجيلات بتقفل الساعة كم؟ بكري بشير.. بكري بشير.. بكري بشير..
اسم بكري بشير يتردد على كل الألسنة والقروبات والهواتف والواتساب والفيس بوك والتويتر.. بس التقول بكري العقرب!!
قروب أزرق شليق بتاع شتل ينشر خبراً: عاااااااااااااااجل.. بكري بشير يصل مطار الخرطوم وفي طريقه للاتحاد للتوقيع..
خبر العاااااجل ينتشر بسرعة وسط الحضور في الاتحاد.. فيهتفون ويصفقون.. بكري بشير وصل وصل وصل.. ويستفسر البعض: بكري وصل؟ ويرد البعض آآآآي وصل.. وهو هسه في المطار وفي عربية حتجيبه الاتحاد طوالي للتوقيع.. وهنا يسارع أحد المشجعين نحو سيارته ليتجه للمطار ويركب معه بعض المشجعين بسرعة والعربة تتحرك والباب مفتوح وأحد المشجعين ممسكاً بباب العربة التي تحركت ويقفز بسرعة لداخل العربة.. وفووووو تطير العربة صوب المطار..
بعد ربع ساعة تعود العربة مكسورة الخاطر ويقول سائقها للمشجعين: ما في حاجة في المطار وأنا ذهبت للاستعلامات قالوا مافي طيارة جاية من الأبيض بالليل ده!!
وهنا تنكمش أعصاب المشجعين وتتلج اجسامهم وأحاسيسهم.. ويقول أحدهم يمكن وصل براً بالعربة.. ويرد عليه آخر لا لا أنا ضربت هسه للأبيض قالوا بكري ما اتحرك!!
ووسط هذه الحالة المزرية وخيبة الأمل والإستياء تظهر سيارة ينزل منها عماد الطيب ومعه ولد يافع متوشح بالأزرق كث الشعر عديم الشارب طويل القامة.. وتهرول الجماهير نحوهما.. ولكن يصيح مشجع ده ما بكري.. بكري ما شافع بكري قصير وعنده شنب!!
ويصيح أحد المشجعين ده (أحمد ميسي) بيلعب في الشعلة بحري..
وتنطلق همهمات: ميسي؟.. ميسي؟.. ميسي؟ الشعلة بحري؟ دي المفاجأة؟
ويتمتم أحدهم: ده شنو يا كردونة.. تقول لينا ممكن تجيب ميسي وبنزينة.. وفي الآخر تجيب لينا ميسي الشعلة.. والله فعلاً مفاجأة.. خيبتنا الله يخيبك!!

ومن إضافي

أطرف نكتة هذين اليومين رواها أخونا محمد عبدالماجد ونصها: ناس الهلال في اليوم الأخير للتسجيلات منتظرين منهم يجيبوا لينا المدافع العاجي دابيلا، أو على الأقل المدافع بكري بشير.. جابوا لينا مدافع الشعلة بحري أحمد يحي!!.. دا زي الضيف البكون منتظر (الغداء).. يقوموا يجيبوا ليه (الشاي)!!

مامون أبو شيبة
صحيفة الصدى