نسرين عجاج: نانسي انتي كنتي نكرة و حفلاتك كلها برعاية جهاز الأمن .. وكيزان شنو الشوهو سمعتو عشانك؟
كتبت نسرين عجاج شقيقة الفنانة نانسي عجاج رداً على حلقتها الأخيرة المثيرة للجدل والتي تم الترويج لها وتسجيلها في دولة الامارات المتحدة، حيث تم الترويج عقب قطع العلاقات السودانية الإماراتية، وتحدثت فيها نانسي عجاج عن مقتل والدها وعن الحرب والشعب السوداني حيث قامت نسرين بدر الدين عجاج شقيقة الفنانة نانسي عجاج بالتعليق والرد على ما يدور في الميديا منذ يومين قائلة :
خلونا نتفق انو:
١- الهدف الاساسي من الفوضى الحاصله دي، هي إشغال الشعب السوداني بقضايا انصرافية. ودا للأسف الشديد تم بنجاح.
٢- البرومو مقصود منو التشويق والاثارة وزيادة نسب المشاهدة. ودا كمان تم بنجاح.
٣- كلامي فقط عن الجزئية البتتكلم عن الوالد رحمة الله عليه باعتبار انها بتخصني شخصياً وبتخص أسرة بدرالدين عجاج، اللي نانسي ما جزء منها.
تبراء الوالد منها سنة ٢٠٠٠ و هي تعلم ذلك. ومنعها تستعمل إسمو.
من وجهة نظري، البرومو النزل دا فيهو إساءة وإشانة سمعة للوالد رحمة الله عليه خاصة، ولكل اسرة عجاج عامة. ونانسي بتخوض في سمعة ابونا عشان تزيد المشاهدات فقط لا غير. إستماته عجيبة لإرضاء السيد.
ومافي زول يقول لي قاصينو.. هي كان ممكن ترفض نشر البرومو بالشكل دا. لكن هي دايرا الحفلة دي.
وما تقولوا لي، العايز يعرف يمشي يحضر البرنامج كامل. دا كلام مردود الى قائله. دا برنامج ترفيهي، ما بحث جامعي عشان المشاهد يمشي اول يستقصى الحقائق حتى يتكلم. وحقائق شنو المفروض يتأكدوا أول منها ؟ بت مفروض بتتكلم عن أبوها. في اعلم من افراد الأسرة الواحدة بشئونها؟ هي الكان مفروض تكون حريصة لو بهمها. نقطة سطر جديد.
بعدين ما من قل نقاط التشويق الفي حياتا هي، كان ممكن تختار اي نقاط تخصها هي. روتانا سينما.
دا كللوا عشان تقول انا ثورجية والكيزان قاصدني؟
طيب يا نانسي، ما دام أضطريتيني اتكلم:
كيزان شنو الشوهو سمعتو عشانك؟ نانسي، من فات قديمو تاه. انتي في يناير ٢٠٠٨ كنتي نكرة عشان يشوهو قامة زي بدرالدين عجاج، عشانك.
ولو في زول كان حيتشوه معاه بسبب شغلوا معاه فهو نهى، ما انتي. سيبي النرجسية.
٢٠٠٨ انتي ما كان عندك فضايح مالية ومعبية؟ الكيزان لو كان دايرين يجوبوكي الارض، ولا كان بغلبوا. لكن انتي بتهم.
نانسي، انتي بالتحديد بت الكيزان. الكيزان كان بفتحوا ليك التلفزيون تغني فيهو من غير طرحه، في حين انو اي واحده تانية لو الهوا ساي زح طرحتا في المسرح، ما بجيبو تسجيلا في التلفزيون.
نانسي، انتي حفلاتك اكتر من تلات ارباعا برعاية زين وجهاز الامن.
تتذكري حفلة راس السنة ٢٠١٨ في بورتسودان؟ دي انا شاهدة عليها. قولي ما متذكرة، والله اذكرك هنا.
خلاص ولا أزيد؟
وقلتي الاتهمك بقتلوا منو؟ اول شي البوليس هو الكان متهمك وبيحقق معاك و وراك في المقام الأول، لأنك كنتي واحد من محاور البحث الأساسية بأعتبار إنك كنتي فاتحة فيهو بلاغ بعدم التعرض قبل ٣ يوم من قتلوا.
انتي الكنتي بتهدديهوا لينا (من ضمنهم انا شخصياً) لمن كنتي بتقولي وبالحرف الواحد: “بابا دا راس مالو عندي، ٢ من رجال الامن يورو الله وين. أخير ليهو يختاني.” تتذكري؟ دا واحد من أسباب إتهام العيلة ليك.
والاستفاد منو؟
على ما اذكر انتي كنتي تالت يوم البكا في الاستديو، عشان تخلصي شريطك التاني تلحقيهوا الدعاية المجانية ديك. قال قال قال، لي روح بابا قال.
أقسم بالله العظيم غلطانة انا الما حفظت وصيتو وخليتك تشيلي عزاهو. أستاهل ضرب الجزم.
ذكرتيني مقولة مالكولم اكس عن عبد الحقل وعبد المنزل.
