قصة رانيا مجد الدين و الـ 53 ألف دولار

كتب رائد الأعمال الشاب محمد بابكر عبر صفحته على فيسبوك منشوراً مثيراً حول عملية احتيال تعرض لها من السيدة رانيا مجد الدين احمد البشير وقال في منشوره :

وضيح وابراء للذمة ⛔⛔⛔⛔
في البداية نقول جل من لا يخطئ ، والغلط الوقعت فية انا ما تقعوا فية ، واتملكني الندم والأسف والحسرة ، بس ممكن نقول لخير ومكتوب ، ويبقي درس .
دخلت علي رانيا مجد الدين احمد البشير بغرض الشراكة كونها عندها مطعم في القاهرة وعلما لا تربطني بها معرفة سابقة ، فقط معرفة ميديا والغلط كان من النقطة دي ، ابعدوا من الميديا ومشاكلها .

اتفقنا نكون شريكين وحسب كلامها مطعمها محتاج توسعة اكتر ، وقالت دخل المطعم اليومي صافي 13 الف جنية مصري .
وعشان اكون شريك معاها لازم ادفع ليها مبلغ 53 الف دولار وحسب علمي من كلامها المطعم بستقبل كل الجنسيات وانا ما عارف المطعم بتاع فسيخ وقراصة .
عارفكم ح تقولوا علي غبي وحمار بس استاهل .
المهم انا شالتني الهاشمية وقلتة دي الترطيبة ذاتها يا محمد في حين مستغرب في نفسي لتاريخ اللحظة وين كان عقلي ، يلا كونها معروفة للناس وبت ناس وما دخلني شك 1% اتجاها بس حسن ظن مني ساي ، وطلعت ما معروفة .

المهم وافقت علي طول من غير تردد وبديت ارسل ليها القروش الي ان وصلت التحاويل ليها مبلغ 35850 دولار أمريكي .
هي كانت مستعجلة جدا اكمل ليها باقي القروش وكل يوم ترسل لي انا منتظرة وانا منتظرة والشغل واقف والكلام دا وكان التخطيط لشئ في نفسها .
مرت حوالي شهرين وانا سألتها اهاا الأمور ماشة كيف في المطعم يعني مثال الايجار والعمال والمصروفات والتفاصيل دي .
احيانا بترد علي بجملة الأمور ماشة كويس بس انا مشغولة الان وعندي إجتماع واحيانا في المستشفى واحيانا طالعة مشوار علي طول في الحال دا للشهور .
قالت لي يا محمد ما تزعجني و وتشغلني بالرسائل والاتصالات ما من حقك تسألني وانت ما كملت المبلغ المتفقين عليهو .
من هنا بديت اشك في حاجة غلط وكانت إشارة من ربنا عشان أوقف .

وقلبي اكلني عديل وبيني وبين نفسي قلتة شكلك يا محمد وقعت وقعة بنت كلب وما سميت مع الزولة دي .
قلتة ليها يا رانيا معليش انا ما عايز معاك شغل ورجعي لي قروشي الرسلتهم ليك ما دام اقل التفاصيل ما بتجاوبي عليها ولا كمان اثبتي بفاتورة واحدة بتثبت انك شغالة في التوسعة ومن حقي أسألك .
قالت لي جدا برجع ليك قروشك وبقت ما بترد علي الإتصالات والرسائل .
طوالي عندي ارقام اولادها دخلت عليهم ، اتواصلت معاهم فقط عشان امهم ما بترد وحكيت ليهم الحاصل لانوا هي ما بترد وما عارف ليها طريق غير اولادها ، علما أرقام وجوازات اولادها رسلتهم لي هي وقت كنت برسل ليها القروش عن طريق الويسترن والغرض كان حقي يرجع لي فقط .
المهم أولادها ما افادوني بحاجة .
وقت اتكلموا معاها جات تجوط وانت ما من حقك تتكلم مع اولادي وكدة ، طوالي قلتة ليها أولادك ديل انا شاحدهم ولا شاحدك يا زولة عندي قروش عندك وعايزها .
الغرض من التواصل مع أقاربها ومعارفها فقط عشان حقي يرجع لي لانوا هي ما بترد .
تواصلت مع زوج اختها وحكيت ليهو الحاصل والتزم لي خلال شهر قروشك بترجع ليك .
رجع لي قبل الشهر يتم بثلاثة ايام واعتذر لي وقال هو خارج الموضوع .
طوالي ركبت مشيت ليها القاهرة ، علما اول مرة اشوفها واشوف المطعم وقت نزلت القاهرة .
اول حاجة المطعم ما بكلف 10 الف دولار دا لو بالغت في التقييم ، يلا المهم دا غلطي انا وتصرفي غلط وارعن .

طوالي جبت محامي وشهود وقعدنا .
اهااا يا رانيا الحل شنو ، قالت لي الحل برجع ليك قروشك علي دفعات لانوا ما معاي المبلغ وصرفتوا مواد للتوسعة .
قلتة ليها ممكن توريني الفواتير الصرفتيها وجبتي بيها مواد ، قدام الناس القاعدين قالت لي ما عندك دخل وقت طالبت بقروشك ترجع ليك وما تدخل في تفاصيل معاي .
قلتة ليها موافق ، بس الضمان شنو انك ح تلتزمي طوالي قالت لي بكتب ليك شرط جزائي 5 الف دولار علي كل شهر تأخير والشهود موجود والمحامي موجود .
الأخ Hneen Civil و HusamEldin Elshafie Osman و Mustafa Abdulhalim Yousef كانوا وسيط خير لحل الموضوع وملمين بكل التفاصيل .
داليا الياس كانت حقانية وقالت كلمة الحق وما خافت من شيء وطلعوها خاينة عشرة
Huda Arabi ايضا قالت كلمة الحق كونها وسيط خير
وكتيرين جدا منهم دخلوا وساطة خير وجودية بس ما طلعوا بشيء منها غير الوعود الكاذبة .
اكمل ليكم باقي الحصل .
عملنا مكاتبة بجدولة المبلغ وقالت لي بديك ارباحك بقدر الفترة الكنت شريك معاي فيها خلال 6 شهور وكانت نسبة الأرباح حقتي 33% من دخل المطعم .
المهم اول دفعة بتاريخ 15/10/2024
المبلغ 11 الف دولار ، وما التزمت وقالت لي انا بدفع الشرط الجزائي وما تكتر كلامك معاي ، قلتة يلا الشرط الجزائي دا ممكن يعوض ليك خسارتك شوية وانا بوهم في نفسي ساي .
حصلت حاجات كتيرة جدا فيها ذلة وإهانة وحقارة ولسانها يا ساتر بس .
طوالي المحامي قال لي عشان تضمن حقك تكتبها وصل أمانة بالمبلغ ووصل الأمانة دا بحفظ ليك حقك ويعتبر زي الشيك تقريبا في السودان .
فعلا كتبت رانيا وصل أمانة بمبلغ 40850 دولار او ما يعادل المبلغ بالمصري ، علما المبلغ الأساسي 35850 + 5000 دولار شرط جزائي عشان كدة المبلغ وصل 40850 دولار عشان تكونوا في الصورة .

الدفعة الثانية بتاريخ 15/11/2024 مبلغ 11 الف دولار وما التزمت .
تاني هي ما كتبت لي وصل أمانة بالشرط الجزائي للشهر الثاني وقالت لي نحل الأول وتاني بعوضك في حين انا ما عشمان في شرط جزائي بس عايز قروشي الأصلية .
الدفعة الثالثة بتاريخ 1512/2024
مبلغ 11 الف دولار وما التزمت وما كتبت شرط جزائي وقالت بتعوضني وكلو تخدير ومراوغة .
الدفعة الأخيرة 1/1/2025
متبقي المبلغ 2850 دولار وما التزمت ولا كتبت شرط جزائي وكمان ما عشمان فيهم .
لو جينا حسبنا المبلغ كلة بالشرط الجزائي ح يصل 50850 دولار أمريكي .
الان القروش تمت سنة معاها وما رجعتها .
التفاوض والحلول الودية كلها فشلت بسببها وعدم جديتها .
الموضوع انتشر وبقي كل شخص عارف انا عايز منها قروش بسبب التداول والكلام وحتي في الميديا الناس نشروا الموضوع ، طلعوا ناس كتار عايزين منها قروش وهم النشروا في الميديا .

طوالي زولتكم بعلاقاتها ومعارفها رفعت فيني قضية تشهير وطالبت تعويض بمبلغ 500 الف ريال ، ونست انا عايز منها قروش وبقت تطارد فيني الي هذة اللحظة .
الان المحاكم شغالة في القاهرة ب وصل الأمانة عشان حقي يرجع لي .
وهي مصرة تأخد تعويض مني ب 500 الف ريال .

عندها كمية كبيرة من المطبلاتية وديل زيهم زي الدعامة .
اخيرا برفق ليكم جزء بسيط ليثبت ليكم صحة كلامي وممكن هي تجي ترد و تتكلم قدام الناس لو انا بكذب في حاجة .
تقبلوا تحياتي .