أحمد دوشي: انا جاي اثير الجدل واقول شكراً للدعامة 😍
كتب الاعلامي والمقاتل في الصفوف الأمامية للقوات المسلحة أحمد دوشي معلقاً على تحرير منطقة الصالحة قائلاً:
انا جاي اثير الجدل واقول شكراً للدعامة 😍
شكراً لحميدتي والمليشيا شكراً للحرب وشكراً قحت وشكراً دويلة الشر والدول المساندة
شكراً حمدوك😂 وشكراً لاحزاب الخراب
انتهت اقامتكم يا دعامة في بيت ابونا الخرطوم زي ما انتهت في الجزيرة وحتنتهي في كل الولايات
اديتونا درس وعظة وعبرة وفوائد كتيرة اكتر من المساوي بتاعت الحرب
وحدتونا كقوات ومواطنين مع الجيش
اصطفي الله سبحانه وتعالي شهداء اكرم مننا جميعا ً
عرفنا انو بابسط الحاجات بنعيش وفي احلك الظروف بنتكافل
اتميز الخبيث من الطيب وظهرت الناس علي حقايقها والنيتو كعبة بان واتفضح
احييتو فينا روح التكافل والمشاركة في السكن وفي الاكل والتكايا خير مثال
ولاول مرة الشعب يحس بي معني الوطنية والشوق للبلد وللاهل والاصحاب
عرفتنا الحرب بي رجال ومواقف ما كنا متخيلين في يوم تلمنا حاجة ونعرفهم ونعاشرهم
عسكرياً احييتوا روح الجهاد والاستعداد والاستنفار خير برهان
بقا عندنا قوات لا تعد ولا تحصي والشعب نصو اتدرب واتاهل
غنائم الحرب اضافة حقيقية للجيش وتعويض عما فقد
عرفنا كيف نصبر ونستخدم سلاح الدعاء المستجاب
و حقيقة فقدنا اموال واعمال وبيوت لكن قادرين باذن الله نعمر من تاني واحسن
عرفنا نعيش مع انعدام ابسط حقوق الانسان البسيط العادي
اكتشفنا المتعاونين والمندسين ومن أحسنا اليهم واستأمناهم وخانونا
واحييتم فينا صلة الارحام ومواصلة الاهل البعيدين وزيارة المدن والقري الاخرى
اللهم ارحم الشهداء واشفي المرضي والمصابين وعجل بالنصر الشامل في كل ربوع السودان
