من طرائف العمل الصحفي وشغل (الجرايد)
من طرائف العمل الصحفي وشغل (الجرايد)
بقلم: محمد الطيب الأمين
كنت ماسك (قسم التدريب في إحدى الصحف).
بتذكر مرة وأنا قاعد في (حوش الصحيفة) جاني واحد من (المتدربين) ومعاهو عمك كبير دا.
المتدرب قال لي : (الحاج دا قال عندو زول مات داير يعمل ليهو نعي).
قلت ليهو (البركة فيكم وحبابك ألف).
عمك لابس ليهو (جلابية بيضا ومكوية) و(شال مطرز بالكُحلي) و(مركوب أصلة) .
والعطر يلخم.
قلت ليهو إتفضل أقعد.
شاي ولا قهوة؟
قال لي : لالا يا ولدي أنا دايرك تكتب لي (تعزية) وتنزلها فوق الجريدة .
وما عارف التعزية عندكم بي كم؟
قلت ليهو (النعي) مجان يا حاج.
دخل يدو في جيبو وطلع ليهو (ورقة فلسكاب) وقال لي : خلاص عليك الله يا ولدي أعمل لينا (نعي جمييييل كدا الله يرضى عليك).
قلت ليهو (نعي جميل) كيف يعني؟
أنت قاصد (نعي جميل) ولا (نعي أليم) ؟
قال لي (نعي) يكون (جميل) ، أصلو المرحوم دا عمنا في الحسبة زول (ضو قبيلة) وما ساهل يا ولدي.
قلت ليهو الله يرحمه بالجنة لكن (النعي نعي ما في نعي جميل ونعي ما جميل).
النعي ببدأ بـ(بشر الصابرين وبنتهي بـ إنا لله وإنا إليه راجعون).
قال لي والله يا ولدي لو دايرين قروش بدفع ليكم بس الله يرضى عليك أعمل ليهو (نعي جميل) لأنو ناس الحلة كلهم منتظرين الجريدة حقتكم بكرة.
لما شفتو مُصر وما داير يفهمني قلت ليهو جداً ياحاج.
طلعت الورقة وكتبت :
بسم الله الرحمن الرحيم
على حُمرة الوردة
وحُب الندى الرقاش
غافل وما عارف
إنو الزمن غشاش
بالله ليه يا فراش
خلاك وراح القاش
الأهل بمنطقة كذا ريفي كذا يتقدمون بالتعازي القلبية الصادقة لفلان الفلاني الذى لبى نداء ربه إثر علة لم تمهله طويلاً ….. الخ).
عمك إبتسم وصلح الشال وقال لي ينصر دينك ذاتو .. بس ياهو كدا.
لما شفتو فرح وإنبسط قربت أكتب ليهو :
يا روعة لو عز اللقاء
فرقنا يا حلوة القدر
دي روعة قاسم مشترك
ما بين وجيهك والقمر.
شوف طيبة أهلنا الكبار ديل عليك الله؟
دائماً هم عايزين يكونوا (أسياد واجب) ويكرموك حتى لو كنت (ميت).
راجل طيب طيبة وبسيط بساطة ما بعدها بساطة والله.
طبعاً أكيد (النعي) ما نزلتو بالطريقة دي وأكيد عمنا لما إشترى الجريدة تاني يوم لقى (النعي أليم وليس جميل).
