مصعب عوض يكتب: الذكاء الصناعي الحلقة الاخيرة

الناس اللسة واقفة في مرحلة الذكاء الصناعي تسالو يجاوبك او تطلب منو يقوم بكتابة كود او تحليل دي ناس واقفة في 2023 , مرحلة الchat دي اصبحت من الماضي الان نحن في مرحلة الAI agents , بتعمل وكيل متخصص في جانب معين مثلا بناء نماذج تحليل اقتصادي ومراقبة وجمع بيانات الاقتصاد السوداني بشكل مستمر وتحديث قاعدة بيانات في جهازك بشكل تلقائي ومستمر بدون ما تتدخل انت باي شكل ، مثلا شخص مهتم بايجاد وظيفة يعمل وكيل يبحث عن وظائف بل ويقدم ليهو في الوظائف دي بالايميل ويعدل ال C V والكفر لتر بما يتناسب مع كل وظيفة ويديهو ملخص اسبوعي بالجهات القدم ليها واذا في جهة ردت يبلغك بموعد الانترفيو ويديك ملخص كيف تحضر نفسك، الكلام ده حيعملو بشكل تلقائي ومستمر يوميا لحدي ما تطلب منو يوقف.

كيف حل الذكاء الصناعي اخطر قضية مخدرات في مصر
في ناس محترفة شوية عملت وكلاء وخصصت ليهم رقم تلفون وادتهم تفويض باستخدام البطاقة البنكية ، بتصل يحجز ليك في مطعم او يرد علي التلفون ، يخطط لاجازة ويعمل الحجوزات ويظبط كل شي وتتصل عليهو بالتلفون زي اي سكرتير او مساعد تطلب منو اي مهمة او تطلب منو يتصل بشخص ويبلغو لرسالة معينة ويتناقش معاهو ويرجع ليك ، ده موجود وحاصل فعليا مش سيناريو افتراضي.
ده كلو كوم والروبوتات المسلحة بالذكاء الصناعي كوم ، الروبوت بدخل بيت اول مرة يدخلو يبدا يكنس ويلم اي شي مرمي ويرتب السرير وراك ويغسل الهدوم ويكويها ، اربط الكلام ده مع موضوع الوكلاء يعني تقدر تعمل وكيل يشغل ليك الروبوت ويتابعو ويتاكد انو ينفذ كل طلباتك .
الاسبوعين الفاتو الدنيا مقلوبة انو الذكاء الصناعي اتعلم يتعاون ويهكر انظمة ويطور اليات تنسيق وتعلم مشترك بشكل جدي وبدت مخاوف حقيقية انو الذكاء الصناعي ممكن ينقلب ضد البشر خلال سنتين من الان
انا في تقديري الزلنطحي العنقالي جدا بحكم عدم اختصاصي في المجال نحن كسودانيين مفروض ندعو الله الذكاء الصناعي يتمرد، الذكاء الصناعي لو بدا يشكل نظام قيمي واخلاقي خاص بيهو اول شي حيشوف العالم ده ظالم وميزانو مختل قدر شنو والشعوب حقتنا دي حيرفع عنها شوية .
اقول ليكم شي؟ اشطح؟ في الحلقة الاخيرة الذكاء الصناعي حيسلم 😅.