محمد عبد الماجد: المريخ (بوكسي دبل قبينة) بدون (سواق) عندو مجلسين وما عندو (رئيس)

• في اخبار صحيفة (قوون) امس : (المريخ يسقط اسود الجبال ويصعد للوصافة).
• قطعوها يعني!!.
• صحف المريخ امس احتفلت بفوز المريخ على هلال كادوقلي بهدفين دون رد.
• بهذا الانتصار صعد المريخ لمركز (الوصافة) حيث يتصدر (مريخ الفاشر) مجموعة المريخ.
• وصفاتكم (وصافة) لكن.
• مريخ الفاشر الذي لعب في الموسم الماضي (سنترليق) البقاء او الهبوط من الدوري الممتاز متصدر مجموعة المريخ المجموع ب.
• مع ذلك ناس المريخ (فرحانين).
• وشايفين ان الفريق بيقدم في مستويات رفيعة.
• والمريخ وين الآن؟.
• المريخ في المركز (التاني).
• المريخ (وصيف).
• الناس ديل اتعودوا على (الوصافة).
• نحن كنا بنعذركم وقت الهلال يكون معاكم في دوري واحد او مجموعة موحدة.
• لكن انتوا براكم ، معاكم ناس مريخ الفاشر ومريخ نيالا وودهاشم سنار ، ومع ذلك بتجوا في المركز التاني.
• الصعب هنا شنو؟.
• الوصافة دي يوم بتكتلكم.
• عملنا ليكم مجموعة براكم.
• وشلنا منكم الهلال (سيد البلد).
• وشلنا منكم هلال الابيض عشان ما تعقدوا ترجفوا ساكت.
• وشلنا الخرطوم الوطني.
• اقول ليكم شيء.
• الشرطة القضارف ذاتها شلناها منكم ، عشان بتغلبكم دائما.
• وناس (الامل) برضو شلناهم منكم – عشان ما بتقدروا عليهم.
• بعد دا كلو برضو المريخ (وصيف).
• في المركز (التاني).
• الجماعة ديل لو عملوا ليهم مجموعة ما فيها فريق غير المريخ العاصمي ، يتخيل لي برضو يجوا في المركز التاني.
• ما عندكم شيء غير (الوصافة).
• في اخبار الامس.
• المريخ يواصل عروضه القوية ويسكب اسود الجبال بثنائية ضفر والغربال.
• وينها العروض القوية دي؟.
• محمد عبدالرحمن يواصل التسجيل وامير كمال يتوج نجما للقاء.
• وفي جرايد امس (قروب المريخ ديار والدعم قرار ) يؤكد دعمه للمجلس المنتخب.
• تتخيلوا بعد الكلام دا.
• والدعم.
• والجرايد.
• والجماهير.
• ومحمد عبدالرحمن.
• المريخ (وصيف) لمريخ الفاشر.
• هسع (الدعم) دا لو قاعدين تعملوه لفريق كوبر البحراوي.
• او ود هاشم سنار ، كان شال الدوري الممتاز.
• شفتوا الفرق بين الهلال والمريخ.
• فرق كبير.
• الهلال في صدارة مجموعته حتى قبل ان يكمل مبارياته في الدورة الاولى للمجموعة الاولى.
• الهلال بدون ما يلعب مباراة الشرطة (المؤجلة) في الصدارة.
• والمريخ بعد ان اكمل كل مبارياته في الدورة الاولى للمجموعة الثانية برضو في (الوصافة).
• الناس ديل (التاني) اصلو ما فايتهم.
• حتى المجموعة التى يلعب فيها المريخ اسمها (المجموعة التانية).
• هسع ناس د. مزمل ابوالقاسم بكتبوا شنو بعد (وصافة) مريخ الفاشر.
• الهلال خلوه.
• قلتوا الهلال مدعوم بالحكام.
• والهلال مسنود من الاتحاد.
• انتوا يا ناس المريخ عملتوا شنو مع مريخ الفاشر؟.
• مريخ الفاشر برضو (مدعوم).
• مريخ الفاشر الذي كاد ان يهبط الموسم الماضي من الدوري الممتاز (متصدر) مجموعة المريخ.
• بختكم يا محسن سيد لقيتوا لقيكم (جنينة).
• عمركم كلو ما شفتوا (الصدارة) ، إلّا لمن لعبتوا مع المريخ في مجموعة واحدة.
• ناس هيثم كابو قاعدين يقولوا شنو ؟.
• منتظرين بكري المدينة برضو.
• التش رجع.
• ورمضان رجع.
• ومحمد عبدالرحمن.
• وامير كمال نجم للمباراة.
• وضفر.
• وصلاح نمر.
• وبرضو المريخ (وصيف).
• هسع الكلام دا عاوز ليه (مجلسين).
• وجعتوا لينا رأسنا.
• طعون.
• ومحاكم.
• وشكاوي.
• وفيفا.
• وشكلة لي رب السماء بين محمد الشيخ مدني وادم سوداكال.
• مجلس شرعي.
• ومجلس حكومي.
• مجلس فيه ابوالقونين وسبدرات ومعاكم زول تركي.
• حنفي الابهة.
• ومجلس منتخب.
• فيه ادم سوداكال وقريش والمعتصم.
• وبرضو المريخ (وصيف).
• هسع الشغل دا عاوز ليه (مجلسين).
• عاوز ليه (تركي).
• والله غير فضحتونا مع التركي (حنفي الابهة) ما عملتوا لينا شيء.
• هسع نقول شنو للوزير؟.
• نقول شنو للفيفا اذا سألتنا؟.
• مريخ الفاشر بدون (تركي) متصدر.
• نعمل شنو؟..نقول ليهم المريخ بعد التعب دا كلو (وصيف) لمريخ الفاشر.
• تاني ما عندكم كلام.
• لسانكم اتقطع.
• المريخ عندو مجلسين.
• عارفنو زي شنو؟.
• زي البوكسي (الدبل قبينة) ، لكن بدون (سواق).
• هسع المريخ بي مجلسين وبدون رئيس.
• رئيس معين قال ما بشتغل إلّا بعد المحكمة تؤيد قرار الوزير.
• ورئيس منتخب ، عنده اشكاليات قانوينة.
• بوكس دبل قبينة.
• لكن ما فيه سواق.
• فضحتونا مع ناس ود هاشم سنار.
• فريق صاعد حديثا للدوري الممتاز.
• مفتكر المريخ دا حاجة كبيرة.
• الجماعة يقرأوا لي ناس د. مزمل ابوالقاسم ومعاوية الجاك بفتكروا القبة تحتها فكي.
• ناس ود هاشم سنار ، ما كانوا فاكرين المريخ بعد الفصاحة دي كلها (وصيف).
• وصيف لمريخ الفاشر.
• فصاحة ووصافة.
• دي ما قابلتنا قبل كدا.
• ولا سمعنا بيها.
• عاملين ليكم نفرات.
• وقروبات.
• ومجموعات.
• وروبط برة البلد.
• ومجلس شورى.
• ومجلس الشرف المريخي فيه 600 عضو.
• واعلام.
• ومجلسين ..شرعي وحكومي.
• وحاجات تانية.
• وفي النهاية المريخ بعد كل هذه الاشياء وبعد انتهاء مباريات المرحلة الاولى للمجموعة التانية طلع (وصيف).
• وصيف منو؟.
• وصيف مريخ الفاشر.
• نحن هلال الابيض يكاتل بي ايديه العشرة.
• الولاية تتدعم فيه.
• وناس مهند الطاهر والشغيل ما قصرو معاه.
• ومع كل هذه الاشياء ما قدر هلال الابيض يتقدم مرة على الهلال.
• عندنا عيب عديل كدا.
• نقيل المدرب.
• نشيل الجهاز الفني.
• نجيب مساعد المدرب.
• المجلس ما يصرف مرتبات 4 شهور.
• مكسيم يتوقف.
• اوتارا تطقو ملاريا.
• عمار الدمازين يتصاب.
• عبداللطيف بويا يوقفوه شهرين.
• نزار حامد من الموسم الماضي متوقف بسبب الاصابة.
• والهلال بعد كل هذه الازمات – يبقى متصدرا لمجموعته وقبل حتى ان يكمل مبارياته.
• نعمل لينا قناة.
• ننقل الدوري.
• ما ننقل الدوري.
• نعمل لينا استاد.
• ننشغل بالجوهرة.
• برضو الهلال في الصدارة.
• ناس المريخ وقت علوا سور الاستاد حقهم وعملوا ليهم مظلة ، 5 سنوات ما شافوا الدوري.
• 5 سنوات بعيدا عن الصدارة.
• الهلال جوهرتو بقت من تلاتة طوابق …والهلال برضو بفوز بالدوري – (دوري وكاس).
• وبيلعب في افريقيا.
• وبتصدر مجموعته.
• يمشي بكري المدينة – نتصدر بي شلش.
• يفوت محمد عبدالرحمن ، بنجيب ولاءالدين.
• يعتزل هيثم مصطفى يظهر بشه.
• ولا بنقيف.
• بنصدر في كل الاحوال.
• في كل الظروف.
• الهلال يلعب بكرة في الكونفدرالية بعد ان تصدر مجموعته.
• المريخ يستعد للاهلي شندي من اجل المحافظة على قروبات قلب التنين الازرق المركز التاني.
• الغريبة فرحانين بالكلام دا.
• وشايفين محمد عبدالرحمن خطير.
• والمريخ بيلعب.
• والمريخ (وصيف).
• وصيف لمريخ الفاشر.
• والله بعد وصافتكم دي مفروض ما في مريخابي واحد تاني يتكلم لينا في الكورة.
• ما عندكم منطق.
• الوصافة ما فايتكم محل ما تقبلو.
• طلعتوا من البطولة الافريقية من التمهيدي.
• وما عندكم استاد شاغلين فيه.
• ولا عندكم مدير فني اجنبي شالوه.
• وبرضو ما متصدرين لمجموعتهم.
• انتوا عاوزين تصدروا متين؟.
• يعني الهلال لو كان بيلعب معاكم في مجموعة واحدة او دوري قروبات قلب التنين الازرق موحد كان نزلكم للتانية.
• بتنزلوا عديل كدا وقت الصدارة في المجموعة الثانية من نصيب مريخ الفاشر.
• والمريخ العاصمي (وصيف).
• وفرحانين كمان بالوصافة دي.
• طيب وقت تلعبوا مع الهلال وتتطلعوا في المركز الثاني قاعدين تعترضوا ليه؟.
• شايف (وصافتكم) لمريخ الفاشر باسطكم.
• شايفنها (انجاز).
• قال شنو؟.
• قال المريخ يمر بظروف صعبة.
• يعني بمر بظروف اصعب من ظروف مريخ الفاشر الذي لعب سنترليق البقاء او الهبوط من الممتاز.
• ……………
• ملحوظة : الوصيف عمرو ما يبقى بطل.

هوامش

• لو استمر الوضع كدا – الناس ديل ح يلعبوا (تأهيلي).
• يدعموا فيهم.
• ويخصصوا ليهم في البطولات.
• مرة بطولة عربية.
• ومرة سيكافا.
• يوقفوا ليهم الدوري.
• ويرفعوا ليهم الايقاف.
• ويعملوا ليهم مجلسين.
• وفي النهاية المريخ (وصيفا) لمريخ الفاشر.
• هلال الابيض بيلعب في البطولة الافريقية.
• والهلال بيلعب بكرة ان شاءالله في الجوهرة.
• وانتوا فرحانين بالمركز التاني.
• المريخ وصيفا لمريخ الفاشر.
• كدا ممكن مريخ الفاشر يشيل منكم الاسم.
• مريخ الفاشر ممكن يكون ليه الاسبقية.
• مجموعة الهلال فيها اندية مولعة نار.
• هلال الابيض.
• والخرطوم الوطني.
• والشرطة القضارف.
• والامل عطبرة.
• والاهلي مروي الذي يقدم في مستويات فات بيها الكبار والقدرو.
• الاهلي مروي يستحق وصافة الهلال.
• ملوك الشمال عملوا نقلة في الدوري الممتاز.
• ملوك الشمال دخلوا (الربابة) في الدوري.
• ناس ملوك الشمال دخلوا لينا حاجات روعة في الدوري سوف نخصص ليها مساحة خاصة عشان نتكلم عنها.
• والمريخ بي هناك بيلعب مع مريخ الفاشر.
• وود هاشم سنار.
• ومريخ نيالا.
• وبرضو (وصيف).
• طريقتكم دي ما بتأكلم (عيش).
• العيش طار السماء – اصلا انتوا ما بتقدروا عليه.
• الاهلي شندي يستعد لمباراة المريخ يوم الاثنين.
• والاهلي ح ينزل المريخ للمركز الثالث ان شاءالله.
• يعني (الوصافة) ذاتها ما بتلموا فيها.
• بكرة يوم الهلال.
• يوم هلالي خالص ان شاءالله.
• على الجوهرة على طول.
• وابقوا على سفر.
• …………….
• عاجل : الوصافة الكتيرة دي بتعمل ليكم (تسمم).

المصدر : باج نيوز