الشاعرة داليا إلياس : إلى السادة شركة LG (..)
عبّرت الشاعرة داليا إلياس عن امتعاضها الشديد تجاه شركة LG الشهيرة، حيث تحدث داليا خلال منشور في صفحتها الشخصية بفيسبوك رصدته محرر موقع سودافاكس الإخباري عن تهاون الشركة واستهتارها الكبير إزاء عملائها ما دفعها لصياغة المنشور التالي:
” صدمة العملاء
فى كل الدول المحترمة التى تجئ حسابات الضمير والإنسانية على رأس قائمة أولوياتها تُعد (خدمة) العملاء فى كل المؤسسات التجارية والخدمية ملاذاً يستجير به الزبون عند الحوجة وإن صغُرت…. إلا فى بلادى… بلاد الإستهتار والتهاون والتلكوء والجشع فإنها تتحول من (خدمة) إلى (صدمة) تستهلك زمنك وطاقتك وتتفرق فيها دماء (حقك) بين الموظفين!!
وإليكم هذه القصة كشاهد:
وبما إنو (الردح) حيبدأ…. فوداعاً للغة العربية الفصحى وحباب (الصفقة)
أهااااااا…. قال ليك قبل سنة تقريباً إشترينا غسالة من ناس (LG)… وأدونا داك ياكرت الضمان لمدة سنة…. وقومى قبل ١٥ يوم يالغسالة أمرضى…. فقلنا نبلغ أهلها يجو يسعفوها ويعالجوها علاج محترم يشبه إسمهم الكبير…. قمنا بلغنا…. قاموا سلوا رووووحنا لحدى ما جانا موظف نضييييف ومسمسم ضارب الجِل ومتقندف… عاين للغسالة من بعيد…. وسألنا كم سؤال من طرف نخرتو…. وكتب لينا فاتورة زيارة منزلية أو إن شئتم الدقة (كشف خاص) بى ١٨٠٠ جنيه ومرق مننا وخلانا زى ما نحنا وقال لينا حيتصلوا عليكم يوروكم تكلفة الإسبيرات… وصراحة ماعرفتا الفكرة شنو فى زيارة مدفوعة القيمة بدون فائدة ملموسة
يازووووول نحرس ونرجى… ونحرس ونرجى…. وكوم الهدوم يكبر…. وجماعتك ماعبرونا!!!
قمنا إتصلنا بى رقم (صدمة العملاء) تااانى… قاموا بعد (لطعونا) زمن فى الخط وكملوا رصيدنا قاموا صدمونا بى إنو الجنى المسمسم مارفع تقرير بلاغنا إلا قبل ساعة بس!!!.. وأخطرونا للعلم إنو إسبير الغسالة (مفتاح تايمر) بى ١٤٨٠٠ غير باقى التفاصيل والتكاليف!!! لاحظوا إنو (مفيتيح)!!!
يعنى رسوم زيارة…. وتكلفة إسبيرات…. وترحيل….ومصنعية…ومكالمات هاتفية!!!
نان يااااا بنات أمى…. الضمان فى شان شنووو؟!!…. ما كان أجيب أسطى من شارع الله أكبر ده يستنفع بالقريشات وينجز لى وأريح رقبتى من لفتكم الطويلة دى!!!
يلا لما سألتا من ميزة الضمان…. سألتنى موظفة (LG) بكل برود…. (إنتو جوة الضمان يعنى)؟!!!
صراحة ماعرفت أرد…. وإتذكرت الغدة والضغط ولعنتا الشيطان!!
عموماً… بعد عرفونا تماماً مستحقين…. وطلبوا مننا نرسل صورة كرت الضمان فى رقم واتس آب… قالوا لينا بنرجع ليكم بى تلفون…. وطبعاً ما رجعوا!!!
قمتا إتصلتا الصباح قلتا أفقدهم…. فالموظفة بكل بساطة قالت إنهم إكتشفوا إنو غسالتنا من دون غسالات الدنيا…. ماعندها (سيريل نمبر)!!
طيب عرفتو كيف؟… قالوا الموظف المسمسم داك قال ليهم كده!!!…. طيب ماقال لينا نحن أصحاب الشأن الواقفين جنبو وشال قروشنا ليييييه؟!!!… ونحن دخلنا شنو لو غسالتكم مافيها رقم متسلسل؟!!… إحتمال عيب فى التصنيع….ولا إنتو ما كاتبنوا بطريقة تقاوم الزمن والظروف!!!
فقامت الموظفة إتخلصت مننا كالعادة وقالت لينا ….( برجع ليكم)
المشكلة إننا مشينا فتشنا الغسالة ولقينا فيها (سيريل نمبر) يرارى!!!
فالواضح جداً إنها محاولة للتهرب من الصيانة وتقديم خدمة محترمة بحسب ما تفرضه شروط الضمان ويضمنه كرت الضمان!!
فأتمنى يعنى تانى يا ناس (LG) تكونوا واضحين وتقولوا ماعندكم ضمان وماتلزموا نفسكم بأى وعود إنتو ماقدرها وتخلوا الناس تاكل نارها وتتصرف بدل ضياع الزمن والجرجرة والتسويف والمماطلة.
بعدين ياريت تعلموا (الدكتور) بتاعكم البيجى للزيارات المنزلية إنو يكون واضح ودقيق ويتعامل بى ذوق لأنو واجهة للشركة ونحن أصحاب حق دافعين ليهو قروش!!
الخلاصة…. السادة شركة(LG)… جيتوا صلحتوا غسالتكم دى بالتراضى والتوافق أهلاً وسهلاً…. ما جيتوا حأشيلها وأشيل (البقج) الكتيرة الملمومة دى وأجيبهم ليكم فى الرئاسة هناك…. وبعد داك أشوف راسى حيقول لى شنو معاكم… وممكن تعتبروهوا تذمر واضح من زولة صاحبة حق فى بلد متهالك وظروف ضاغطة مابتحتمل حركاتكم دى نهائى ولا نحن ناقصنكم بالله
وعشان ماتتعبوا وتفتشوا إسمى…. البلاغ بى إسم (مرام عامر)… وماتعملوا فيها رايحين عشان البوست حقى ده حيكون زى النار فى الهشيم وحيصلكم… حيصلكم!! وإن لم (تعودوا)… (عدنا)!!
غياظين وحقارين يعلم الله ”
سودافاكس
