داليا إلياس ترد على اتهامها بأنها سبب فصل الراحل محمد محمود من قناة النيل الأزرق
سودافاكس ـ ردت الاعلامية داليا إلياس على الانباء المتداولة التي اتهمتها بأنها سبب فصل الراحل محمد محمود ” حسكا” الذي وافته المنية إثر علة مرضية مفاجئة بالعاصمة المصرية القاهرة قبل أيام .
حيث كتبت داليا خلال منشور بصفحتها الرسمية بموقع فيسبوك بحسب ما رصد محرر موقع سودافاكس الإخباري:
(بالنسبة للغثاء المثير للشفقة والأسي المتداول عن كوني كنت السبب قبل عشرة سنوات في فصل المرحوم محمد محمود من قناة النيل الأزرق!!!
للأسف طبعاً في ناس تفتقر لنعمة العقل والتدبُّر والتفكير وتستفزك بغباءها قدر ما تحاول تتجاوز وتترفع وتتجاهل.. وتضطراك تعقِّب إنصافاً لنفسك وتسجيلاً لموقف وترفُقاً بأطراف تعنيك وتصدياً لعبث يُحزِّنك علي البلد وناسها والله !!
يا جماعة إنتوا جادين في تفكيركم ده؟!! بي (صِحكم)؟!!! معقولة كمية العبط والهبالة والتخلف والغباء والحقد ديل؟!!! وين (تبيَّنوا) الأمرونا بيها عياناً بياناً؟!!
كدى بس نسألكم… أنا سلطتي شنو في النيل الأزرق وعلاقتي الوظيفية بيها شنو؟!… وحأفصل المرحوم ربنا يتقبله ويوسده الباردة تحديداً من دون زميلاته وزملاؤه ليييييييه؟!!
نحن لا حصل أشتغلنا سوا ولا بنتعارف من قريب ولا إتقاطعنا في مصلحة ولا متنافسين ولا بيناتنا أي تعامل ولا حصل جبت سيرته طوال سنوات والمعروف عني إني لو عندي رأي أو تحفظ ماقعد أسكت ولا بخاف الحمد لله!!
القناة حتسمع كلامي وتفصل مذيع ناجح ومحبوب وجايب ليها جمهور ومشاهدات ليه مثلاً؟!!… والسبب ممكن يكون شنو؟!….أنا مسكت ياتو منصب قيادي يرغمهم يطاوعوني؟! هل تفتكروا قناة بهذا الحجم وبعدد الموظفين الفيها ممكن تتعامل بسذاجة ومحسوبية وعدم مهنية للدرجة دي؟!!
وياتو يوم شفتوني قطعت عيش زول ولا خُضت في عرض زول ولا أذيت زول؟!!
الناس ليه ما بتشغل مخها ببساطة؟!! ليه بتسمحوا لي نفسكم تكونوا مجرد تُّبّع للأذي والجهالة والسفالة؟!! كيف الواحد بيقبل علي نفسه يكون حقير وغبى ويجيب لي نفسه ذنوب ماليها لازمة؟!!
وليه الآن تحديداً يتم تداول هذا السخف؟! ومنو الوراه؟!! وعلاقته بالمرحوم شنو؟!! ووين كان الإهتمام والمحبة ديل في حياته؟! وهل كان الفصل سبباً في الوفاة؟!!
عموماً… حسبي الله ونعم الوكيل في كل ظالم متطاول وكل كلمة جارحة متجاوزة… وكل إتهام جزافى…. جعلت كل خائض مع الخائضين خصمي يوم الموقف العظيم….
اللهم عافنا من هوس النفاق والترند والمتاجرة بالموت وتجميد العقل والضمير.
كل العاملين في النيل الأزرق من أستاذ حسن فضل المولى وحتي أصغر موظف… الساكت عن الحق شيطان أخرس…. والصمت لن يعفيكم من مسئولية مايحدث لنا من سب وقذف وتطاول وظلم…أنتم تعلمون و الله أعلم.
اللهم نسألك العفو والعافية و حُسن الخاتمة… ولا تجعلنا من الإمعة الظالمين ولا تجعل الدنيا شغلنا الشاغل ولا تنسينا رهبة الموت.
لاحول ولاقوة إلا بالله… نِعم المولى ونِعم النصير).
د(اليا) س
سودافاكس
