محمد الطيب الأمين: النمل ينقل (السكري) !!

* معروف سلفاً ان الملاريا تنتقل بواسطة (نسوان البعوض) ..
* (نساء البعوض) والاسم العلمي هو : (أنثى الأنوفليس) ..
* تمتص (أنثي البعوض) دم (فلان) وتأتي لتشرب من دم (علان) فينتقل المرض بين الناس ..
* وبما أن البعوض ناقل للملاريا فان (النمل) أصبح ناقلا للسكري ..
* بعد أن (أكل) النمل (450) شوال سكر أصبحنا على قناعة بأن النمل ينقل (السكري) ..
* تاني لو (قرصتك نملة) طوالي أمشي أفحص (السكري) ..
* ولقدام كده إحتمال (الجراد) ينقل (الايدز) ..
* لكن أنا في حاجة واحدة داير أعرفها ..
* النمل الأكل السكر ده (ذكر ولا أنثى) ؟؟
* حاجة تكسف ..
* الذي يزرع (بذرة خير) لا يحصد (شر) ..
* والذي يزرع (الشر) عليه ان لا ينتظر (الخير) ..
* وهذه معلومة قديمة نُهديها للذين يعيشون حياتهم بـ(وشين) ..
* قد تكون البسمة (مسكول ريد) ولذلك نطلب من كل (بت) لا تملك (رصيد كافي) ان لا تمسكل بـ(البسمات) ..
* نحن (البسمة المسكول) بتحمينا النوم ..
* تأثير (الواسطة) في السودان يفوق تأثير (شهادة الماجستير) ..
* والواسطة هي الشهادة الثانية في السودان بعد شهادة (لا الله إلا الله محمد رسول الله صلى الله عليه وسلم) ..
* قنواتنا السودانية يوم مع (عرب سات) ويوم مع (نايل سات) ..
* والقصة ما قصة (قمر) .. القصة قصة (مشاهد أذكى من الشاشة الغشاشة) ..
* عرب سات ولا نايل سات ولا (عدس) سات .. البرامج بتاعتكم دي ما جايبة حقها ..
* بمناسبة عدس سات ..
* (عدس سات) يعني (عدسات لاصقة) ..
* المذيعات بقن الواحدة تظهر مرة مرتين فى الشاشة تجري جري تعمل ليها عدسات لاصقة ..
* يلصقن العدسات ديل ويقعدن يتلفتن زي (مكيف الكهرباء) ..
* خليك من المذيعات ..
* قبل كم يوم قابلت لي ولد عيونو زي عيون (الكلب البلدي) ..
* قلت ليهم ده مالو ؟؟ قالوا لي مُركب عدسات لاصقة ..
* ولد مُركب عدسات لاصقة !!
* نرجع ونقول : (التحية لكل ولد ما قاعد يلبس ملابس أختو والتحية لكل بت ما قاعدة تشرب سجائر) ..
* إستشارة الطبيب عند المرض أحياناً تضر المريض ..
* وعدم إستشارة الطبيب في بعض الأوقات تنفع المريض ..
* طبعاً بنقصد الأطباء خريجين (الجغرافيا والحاسوب) ..
* في السابق كنا نقفل الشباك خوفا من (الهواء) والآن أصبحنا نقفل الشباك خوفا من (الحرامي) حتى إذا قتلتنا (السخانة) ..
* أكثر شئ يعجبني في الفنان القامة إبراهيم حسين صاحب (نجمة نجمة الليل نعدو) هو (التواضع والأدب واحترامه لنفسه) ..
* ابراهيم حسين (زول في حالو) وقد إستغلت اجهزة الإعلام
(طيبته) و(تواضعه) فظلمته ..
* علمنا ان ابراهيم حسين (متحسس شوية) فنسأل له الله الشفاء والعافية والعيشة السعيدة ..
* في كل يوم جديد نسمع بظهور إذاعة جديدة ..
* البلد كلها بقت (إذاعات) و(مطاعم) و(محلات عماري) ..
* الإستثمار فى الهواء المباشر ساهل ولكن هل نحن نملك مستمعين لكل هذه الإذاعات الكتيرة والمسيخة ؟؟
* كل العالم العربي مشغول بـ(أحلى صوت) الذي تقدمه (ام بي سي) هذه الايام ..
* والعالم العربي في الوقت الراهن لا يحتاج لـ(أحلى صوت) وإنما يحتاج لـ(ارجل راجل) يعيد للاسلام وللعرب السيرة الأولى ..
* قمة الألم ان تقوم بغسيل (الكُلى) مرتين فى الأسبوع ..
* وقمة السعادة أن تصرف (مرتب ومعاهو حافز ثم تجد فى الشارع قروش واقعة) ..
* والله زمان لما الدنيا كانت بخيرها الواحد كان كل يومين بيلقى ليهو قروش واقعة فى الشارع ..
* لكن هسه البتقع منو قروش هو بيمشي (تجاني الماحي) والبيلقى قروش واقعة برضو بيمشي (تجاني الماحي) ..
* وبصراحة أنا ما عارف القروش بقت ما بتقع ولا الناس بقت ما عندها قروش ولا دي (بطاقة الصراف الآلي) ؟؟
* الله يقطع سنين الصراف الآلي البقى لينا فى حلقنا ..
* كنا عايشين بالقروش الواقعة وهسه مع (البطاقات) دي بقينا دايشين ..
* بالمناسبة الشعب السوداني (أمين بالفطرة) ..
* يعني حتى لو لقى قروش واقعة ممكن يسألك يقول ليك : الخمسين دي حقتك ؟؟
* نحنا والله فى مجتمعنا ده عندنا حاجات حلوة جدا ..
* حاجات بنتمنى إنها تستمر إن شاء الله ..
* المهم ..
* الفنانة ندى القلعة قالت انها محسودة عشان كده ما عندها علاقات داخل الوسط الفني..
* يا ندى الحسد من داخل الوسط ولا من بره الوسط عشان نكون عارفين ؟؟
* والشئ التاني يا (ندوية) انتي محسودة في صوتك ولا محسودة في (الدهب والإكسسورات) برضو عشان نكون عارفين ؟؟
* وغايتو جنس غايتو ..
* حينما يتعرض الإنسان لـ(كسر) فى (الساق) أو في (اليد) تجد الناس ينصحوه بـ(أكل الجداد والتُرمس) ..
* الجداد يساهم فى علاج (الكسر) ..
* وبما أن ذلك كذلك فنحن نسأل عن ما هي (الوجبة) التي تساعد فى علاج (الخاطر المكسور) ..
* (خواطرنا إدشدشت) ..
* ونركب صافنات ونجيبة (دنقلاوية) وأصلو الزول بيموت والذكرى تفضل حية ..
* و..و..
* ولو جارت عليك أيام تعال … (قيل معانا) ..

المصدر : باج نيوز