تعالو نشوف المليشيا الواحدة البتكون داخلة في الحرب بي صرفتين

تعالو نشوف المليشيا الواحدة البتكون داخلة في الحرب بي صرفتين (صرفة من بورتسودان وصرفة من جماعة الحكومة الموازية) وطبعا في الحروب صوتهم هو الاقوى لانهم شايلين سلاح واي طرف عايز يكسبهم لجانبه اما المدنيين ف هم بتاعين كلام ساي لابقتل ولافيهو بل وجغم ولابغير نتيجة معركة عشان كدا البشجعوا الحرب منهم عبارة عن صفاقة فقط وبعتبروهم صحبة راكب …

1/ العدل والمساواة انشقت لي تلاتة (جبريل وارباب مع الجيش / صندل مع الدعامة)
2/ مجلس الصحوة الثوري انشق لي تلاتة (هلال مع الجيش / حارن وعجب الدور مع الدعم)
3/ تجمع قوى التحرير انقسم لي اتنين (عبدالله يحي مع الجيش / الطاهر حجر مع الدعم)
4/ المجلس الانتقالي انقسم لي اتنين ( برنقو مع الجيش / والهادي ادريس مع الدعم)
5/ حركة تحرير السودان اصلا مقسمة لي عشرات الحركات التي تحمل نفس الاسم لكن الاشتركن في الحرب خمسة (مناوي وطمبور مع الجيش / ابوالقاسم وعبدالشافع وحسب النبي) …

6/ التحالف السوداني انقسم لي اتنين ( بحرالدين مع الجيش /والحافظ ابراهيم مع الدعم)
7/ حركة تمازج انقسمت لي اتنين (قطاع جلهاك مع الجيش / محمد علي قرشي مع الدعم)
8/ الحركة الشعبية (عقار مع الجيش / الحلو مع الدعم)
9/ مؤتمر البجا انقسم لي تلاتة (ضرار وابوامنة مع الجيش / اسامة سعيد مع الدعم)
10/ الاسود الحرة (الشاذلي مع الجيش / مبارك مبروك سليم مع الدعم)

(ملحوظة)

_ للامانة في حركتين بحملو نفس اسم (الاسود الحرة) لكن م متأكد اذا هم كانو سوا ولا لا لكن المؤكد انو جناح الشاذلي موجود هسه في الشمالية اما مبارك سليم اصلا ناسو في كسلا …

_ م كل الحركات دي اتقسمت في الحرب في حركات اصلا مقسمة من زمان لكن الاتقسمو في الحرب هم (جبريل وصندل/ بحرالدين وحافظ/ برنقو والهادي/ يحي وحجر/ قرشي وقطاع جلهاك / حارن وهلال / ابوامنة واسامة) …

_ م قلتا ليكم الحرب دي عبارة عن سوق لاي زول شايل سلاح (مستحيل زول شايل سلاح وفي حرب مدورة ومايشترك فيها) وكلما طال امد الحرب زادت الاطراف المشاركة فيها (اتخيلو لحدي الان المليشيات المشاركة في الحرب سوا كان هنا ولا هناك وصل عددها لي 57 مليشيا والساقية لسة مدورة) ….

_ طبعا اي مليشيا شاركت في الحرب مع طرف من الاطراف بتكون اخدت وعد بنصيب معقول في السلطة والثروة (شوفو تعليقات رئيس تمازج الفي الصورة اعلاه) عشان كدا اتشققوا ذي البطيخ النجيض في السخانة واي حركة اتقسمت لي تلاتة واربعة ذي كيمان المرارة وكلو عشان المنصب … عجبي
الله غالب

بقلم : مهادن الزعيم



اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم خدمة أكيسميت للتقليل من البريد المزعجة. اعرف المزيد عن كيفية التعامل مع بيانات التعليقات الخاصة بك processed.