الطيب عبد الماجد يكتب: إنتخابات النادي …!!

يوميات ( علوب )

إنتخابات النادي …!!

عمك الباقر دا في الحلة منصِب نفسو زي عمدة الحلة كدا …!
لا في زول نصّبو ولا أي حاجه براهو كدا حالة ذهنيه عالقة تحولت لي ( مرضة )

الطيب عبد الماجد يكتب: أمريكا …هلال مريخ

أها زولك على حِس ( المنصب النصاب) دا
متبني ليك القضايا الكبيرة الفي الحلة
والمقترحات

وتزوير علني في التاريخ …

قال أجدادو لما جو حلتنا دي كانت خرابة
ساكت …

( الغريبة هي لي هسا خرابه ) 😂

وهو خوجلي ذاتو جا بداية التمنينات

( جابو السيل )

لاشايفين عمارات لا حارين سفارات
ياها بيوتنا والناس اللافه دي
وذات التاريخ والأحداث

( الليله سماية ) …( بكره بِكا )
( مصطفى اغترب ) …( عادل دخل الجامعة ) …..
( سحر عرسوها ) و ( بخيتة طلقوها )

( بخيته دي منو كمان ) !!؟؟ 🤔

( إسماعيل أخدو في القضائية ) ….و ( أزهري طلع معرس في مرتو واحده في الكاملين ..)

( دا عبّر …الليلة سجمو )

( باشري حرامي ) وناس فوزيه عاملين صندوق …

( تسمع الصندوق تقول صندوق الإنماء الزراعي )

و ( سمية ) حامل لكن داسنو خايفين العين )

بس ياها القصص دي مدورة

هو ( الليدي ديانا ) أعلنت عن حملها في الصُحف البريطانيه وإنها في الأسبوع التاني …وجايبه ولي العهد البريطاني …
عين شنو يا ( سميه ) عليك الله …

بس ياهو كدا تاني مافي شي

( دورة حياة الحلل العادية )

المهم ( خوجلي ) داخل في الشخصية
وعداء شديد لي أي مظاهر حداثة

يعني عندنا شباب في الحلة مستنيرين كدا ومتبنيين أفكار جديدة قالو دايرين يعملو مكتبة ونادي ثقافي للإرتقاء بالوعي بتاع الحلةويكون فيهو زي مركز صحي صغير يقدم التوعية الصحية
يطعّم الشفع ويقيس الضغط لي ناس الحله الكبار ( عارفنو رافع )

( وناس خوجلي ديل من أدوات الرفع )

أها بناء على هذه التحركات الشبابيه عمك خوجلي قال ديل عبدة الشياطين عايزين يدخّلوا أفكار جديده في الحلة
وشنو ماعارف

خوجلي طبعا بتخيل إنو الحداثه دي
ستقضي على مهامه في نشر الوعي والتنوير …

( اقصد ( العوي ) والتضليل )

الهم لاقيتو جنب دكان ( يس ) قلت لي كيفك ياعم خوجلي شنو اليومين ديل ما ظاهر ..!؟

قال لي والله ياعلوب مشغولين شويه مع انتخابات النادي الجماعة مصرين أترشح 😂😂

( طبعاً الجماعة ديل هو ذاتو )

قال كان نسدد جزء من دين البلد دي 😳

( ضحكت والله أسوي شنو )

إنت ما تقول أسدد ديوني عديل البلد خليها …كل زول عامل متحدث بي اسمها المسكينة دي ..!!

تسمع النادي تقول ( برشلونه )

خرابة كدا فيها ( طربيزتين ) كشتينه ♠️♥️
وطربيزة ( ضُمّنة )
وأضافو ( الليدو ) 🔴🟢 كنشاط جديد
بس ياهو دا …

وفي واحد كدا جاب ليهم اربعة ( كشاتبن ) جديده …
مغترب إسمو ( جمال )
( بلبس جلابيه سعوديه لما يجي الاجازة )

قربو يعملو لي تمثال

حريف غايتو فدى نفسو بي شايب شيريا
♣️ وعشرة ديناري ♦️

و( عشره ريال ) …

المهم دعونا كلنا لانتخابات النادي …
تحلف تقول إنتخابات ( الكونغرس )

استقطابات تقيلة ومشاورات ..

وفي أعمامك كدا عاملين تحالفات لاسقاط ( خوجلي ) دا ..
وهو ذاتو حاشد ناس ( مواسير ) كدا
واحد إسمو ( الحاج ) اكبر رمتالي في الحلة
خوجلي واعدو لو فاز يديهو عطاء ( الردمية ) بتاعة النادي استعداداً للخريف

وواحد تاني إسمو ( قاسم ) ….!!
دا طلع من بطمن أمو ( قاسم ) …
لو لقاك شايل سندويتش بقسمو معاك ….

ومافي أي مقترحات لتطوير النادي
كل البرامج الإنتخابية مركزة على الصيانة
والرسوم …!!

( دايرين يلهطو ) 😎

أها معانا في الحلة ود جدع كدا إسمو
( الباقر )
الباقر دا من الأولاد الممتازين
هميم كدا وبتصدى لي قضايا الحلة الأساسية ….!!
كان متبني مشروع إنارة الشوارع والزقاقات الداخليه وفعلاً نجح واستنفر أولادنا المغتربين ديل بِثقو فيهو ودعموهو
وشفنا النتيجه بي عيونا ..أكتر من شارع
نوّر …

جو ناس الكهربا ساعدونا …قطعوها كلو كلو
وهسا متبني الطاقة الشمسية

أها المره دي قرر إنو يترشح للنادي قال يكون نقطة إنطلاق لإعمار الحلة
وفعلا قدر ينقل رسالته للشباب …
ودعاهم للمشاركة

قامو ناس ( خوجلي ) قبل يوم الانتخابا اتفاجاءو بي كميه من الشباب السجلوا
في الجمعية العمومية للنادي وبالتالي
يحق لهم التصويت
وهي سابقة لم تحدث منذ تأسيسه …

فعلا يازول كلنا جينا …والفيس بوك
والوسايط دوّرت فتحولت انتخابات النادي لي حدث ضخم
( نسوان الحله بقى عندهم خبر ) …!!

أعمامك ذاتم اتفاجاءوا….
بقت مافي طريقة غير يضيفو أسماء جديده للمرشحين ..

خوجلي قايد مجموعتو وبرنامجو كلو
مركز على ضرب المجموعات التانية

وفي مجموعة كدا قايدا واحد اسمو
( الجبلابي )

دا كمان جلابي عندو فرنين ومغلق
وبيت ماهل كدا
وطارح نفسو من رأسمالية الحلة

أها دا غايتو مجموعتو كبيره مستقطب
كل الطبالين وعشاق ( بنكك )
عايز رئاسة النادي مدخل لي ترشيحات أكبر

في واحد عامل فيهو قصيدة
قال ..

جبلابي يا الجبلابي ..عزيز علينا وغالي
الحلة بيك تزدان تلمع دوام وتلالي
جلابتك البيضا وفرنك ( الآلي ) 💃

( أصلو مافي شي مضيعنا غير الديوك ديل )

وهو ذاتو الفرن ولا ( آلي ) ولاحاجه ( حطب ) عادي
لكنه خيال الشعر يرتاد الثريا
ومرات ( الثرى ) …زي قصيدة الزول الرِمة دا

المهم يازول حشد تقيل …!!
غايتو الحلة لقت ليها برنامج من مافي ….قاطعة موضوع ليها زمن

وناس عمك ( الريّح ) و ( بدر الدين ) ديل
قايدين مجموعة إسمها ( الإصلاح والظواهر السالبة )
( الكشتينه ) ذاتا عندهم فيها راي
مدعومين من بعض أولاد حلتنا الماخدين
يمين شديد ديل …

وياها مجموعة ( الباقر ) دي مدعومة بي
كمية من الشباب وعليها إجماع أكتر

ورُصدت محاولات للتأثير على لجنة الانتخابات نفسها …

ماسكا واحد اسمو ( سعد الدين )
كان شغال في الولاية …هو زول كويس كدا
لكن على حِس الولاية دي شغال بي مكنة الوالي ذاتو في الحلة …

كلامو كلو الولايه تركت والولايه فعلت
لكن بعرف لي اللوايح والقوانين والقصص دي رغم إنو فاكيها في روحو إلا مافي بديل …!!

المهم جاء اليوم الموعود ولأول مره نادي
الحلة يعج بالسكان
و ( سعد ) معاهو اتنين كدا حاسي بالعظمة الناس كلها تعاين ليهو

( غايتو الليله والي جد جد )

ضابي لي كم ( فايل ) كدا وحايم
بعتمدو في الرموز الإنتخابية …

الباقر رمزو ( اللمبة ) 💡و ( الجبلابي ) اختار ( النجمة ) ⭐️

( دا فقد الهلالاب خلاص )

ناس عمك ( بدر الدين ) بتاعين الإصلاح قالو الرموز حرام ..
بعد وساطة ونقاشات اختاروا ( الهلال ) 🌙

( كدا تعادل )

ومجموعة ( خوجلي ) رمزهم ( الحمامة ) 🕊️

( حمامة ميتة غايتو )

( قال بدعو للسلم الإجتماعي …وهو متبني النهب الجماعي )

المهم اكتملت الاستعدادات للتصويت
وناس ( سعد الدين ) خاتين الأوراق في
ركن كدا زي ( ستارة الحُقّن )
تخش تختار رمزك وتكبو في الصندوق قدامن ..!!📦

خوجلي وكت لقى الشباب كتار عرف إنو
طاير …داير يعمل ليهو تمثيليه تزوير
فشلت …🐒

وتراشق كلامي بين مجموعة ( الإصلاح ) وجماعة ( الجبلابي )

قالو هو ( الجبلابي ) بغش في الدقيق وغير
مؤهل ..

ونحن غايتو مستمتعين ب ( المّسيّرات ) دي

الحاجه الكويسه مع ( الفيس ) دا النسوان في البيوت عرفن ومتابعات الحدث …
(
( فلقصة ) كاتبه ليها بوست …

( الحلة إلى أين ..!؟؟

حتكون لي وين يعني يا أميرة
حتدخل ( نادي باريس )
ما ياها الحلة ..

و ( الجبلابي ) جايب سندوتشات كدا وبارد
ناس ( الكجم ) وشفع الحلة صوتو كلهم
في ( صندوق ) البيبسي دا ….وبالإجماع

لكن بي أمانه مجرد الحراك الحاصل دا
( نقلة )
أول مره الناس تتكلم عن مشاكل الحلة والمدرسة والصحة والقصص دي
ولأول مرة يحدث نوع من الحركة …

وناس الحله ذاتم حاسين بي عظمة كدا
في الأجواء الإنتخابية دي

تسمع ( صوتك أمانة فلا تبخل به ) ✅

ولافته معلقة في حيطة النادي

( صوتك ( سوطك ) في ضهر الزمان الشين ) ✌️

( معناها ( خوجلي ) دا مفروض أول زول يتجلد )

ناس الإصلاح كمان زودوها شوية
عاملين ليهم صفحة في ( Facebook)
إسمها ( لازم تنضف ) …!!

لاعرفناهم قاصدين الوساخة ولا الناس ..!؟؟

وهم ما فسروا

المهم غايتو أجواء رهيبة ….

انتهي التصويت الساعة ( عشرة ) بالليل
بتوقيت حلتنا 🔓
وبدت عمليات الفرز وسط متابعة كل التيارات

( غايتو النادي ذاتو بكون بضحك من الحالة
العلي ) …

( اكتر ناس متضررين جماعة الكشاتين
اليوم داك ( off )
وفي طربيزة انتقلت لي بيت واحد فيهم
ديل بنتخبو ( الجوكر ) بس 🤡

وأخيراً ظهرت النتايج الأوليه ..
( الباقر ) متقدم ومزاحموا ( الجبلابي ) بتصدقو ….!!

( لاعب بالرغيفة المجرم )

( خوجلي ) متأخر شديد …وجماعة الإصلاح
الاكتر تنظيم …

المهم زي الساعة حداشر وربع كدا
( سعد الدين ) طلع المنصة لإعلان النتايج
النهائية….

عمل لي كلمة كدا

( دي فرصة بلقاها كل خمسة سنين ) …

قال نشكر الجميع على المشاركة الواسعة
والسلوك المنضبط ونتمني للفايزين
مسيره موفقه للنادي

وبدا يستعرض في المتنافسين ..وكلام كتير كدا ..لحدي ما الناس بدت تكورك

النتيجه …النتيجه 😱😱

كان ليهو مراد يتكلم للصباح

المهم قال وبعد فرز جميع الأصوات
واستبعاد الأصوات التالفة 🗑️❎

التالفة دي ناس ( عبد الدايم )
مصوّت تلاته مرات ..!!
( طابع ورق )

( دا بكون قابض كاش )

المهم ( سعد الدين ) أخد لي سكته كدا للتشويق ..وأعلن النتيجة

الفائز بانتخابات النادي في دورته الخامسة
(وهي دي اول دورة ) 😂
ساكت كدا قالا لزوم التفخيم

قال والفائز هو …🎤

( الباقر أحمد محمد الطاهر )
( شباب من أجل البناء )

🙌🙌✊🥰
يازووووول الصفقة دي دورت والصفافير
👏👏👏 🤝😱😱💥

فاز ( الباقر ) ومجموعتو وسط فرحة عارمة
من الشباب …
ناس ود الحاجه تصفيق شديد ..وكواريك

عندنا واحد كدا إسمو ( مأمون ) بتاع سياسة طوالي هتف
لن يحكمنا البنك الدولي 😱

( شوف نادينا اللقاها )

وفي ناس صفقت برضو ورددت الهتاف 😂

عمك ( الهادي )،دا مرضان ( كشتينه )
قال للباقر مبروك …نحن معاكم لكن
كان قربتو من الطربيزة دي بنجركم خمسين …ونرميكم بايظ
وسط ضحات الحاضرين

الباقر قال لي يازول أي زول يعمل الدايرو
طالما لا يتعدي على سعادة الآخرين نحن هدفنا إسعاد الناس

خوجلي مشى حضن الباقر وهناهو …

( داير يخش بي صرفتين السفاح ) …

وانفض السامر …وانتهت أول انتخابات تشريعية في حلتنا …
بين صوت ( اللمبة ) وسوط ( الرغيفة )

وترانا ماشين …

مبروك يا باقر …
في انتظار مخرجات ..