الطيب عبد الماجد يكتب: ( كلاسيكو الأرض )

زمان كان معانا واحد في حلتنا كضاب
كدا ومستهبل شديد لكن بي استهبالو دا الناس بتفاعلو معاهو وعامل جو ….وهو ذاتو ما زول مؤذي بعِز روحو بس ..
وكضبتو ( لازمة ) ما ( متعدية ) كلها عنو هو بس …!! ما قلل من حدة الخسائر
إسمو ( التجاني )
أها ( التجاني ) دا لاقاني مره كدا في الفسّحة القدام بيتنا دي .. بعد التحايا والسلامات …!!
قلت ليهو أها كيف يا ( تجاني ) الأخبار شنو
قال لي تعبان شديد والله ياعلوب …!!
قلنا لي خير إن شاء الله في شنو ..!؟؟

الطيب عبد الماجد يكتب : مأمون سوار الدهب .. الأغنية الغلط في المكان الغلط

الطيب عبد الماجد يكتب : شوف يا صاحبي ….!!
قال لي جوني عقدين عمل واحد في ( الدوحة ) قطر والتاني في ( الخُبر ) السعودية
وماعارف أسوي شنو ..!!
أبو الزفت ..( اتنين مرة واحده )
أنا طبعاً كتمت الضحكة داير أتشرق
تسمع ( عقدين ) تقول اخصائي المناظير
وهو أخصائي ( مواسير )
لكن برضو أبديت تجاوب …
ياخ مجرد إنو تعيش مثل هذه الأجواء فالأمر يستدعي …
والسودان وقتها أمورو جايطة …وشغل مافي ….وحر …
( ماكنا عارفين القيامة جايه )
المهم أنا ذاتي دخلت الأجواء …
قلت لي شوف يالتجاني إنت تختار الحتة البتتناسب مع قدراتك …!!
تاني كتمتها 😂
لأنو ( الحته ) الوحيدة البتتناسب مع قدرات ( التجاني ) دا ياها ( المسطبة ) القدام دكان ( يس ) دي
بجي بلقانا بنضرب لينا في ( فتة ) متكلين في صناديق البيبسي ديك
و ( البيبسي ) في السودان شراب وقعاد )
وهذه لم يفعلها الأمريكان
فيتسلل كما النسيم يحكي لينا نكته
كدا نقول ليهو أتفضل …!!
طوالي بتفضل
وهو ذاتو فنان بختار المناسبة وبفصِل عليها النكته ….!!
يعني يقول ليك بمناسبة ( الفتة ) دي وبحكي نكتتو …!!
وبتكون عندها علاقة بالموضوع
المهم دي طريقتو …!!
( راجل مرتب ويمتلك أدواتو )
و لديه مقدره فائقة على الإستدعاء
غايتو ( التجاني ) دا لو وظّف قدراتو دي
بي شكل تاني كان عمل ( نقله )
المهم بكون ( الشير ) بتاعو ياها النكته
دي …
ياكل ويقُش خشمو ويتخارج
دا ياهو ( التجاني )
نرجع ل ( الخُبر ) …
قال لي والله يا علوب أنا ذاتي قلت كدا
لكن ( الدوحة ) قروشا اكتر …
هيااااا اخوانا 😳
( الله يستر معناها الزول دا مفلس اليومين
ديل )
قلت لي خلاص غربه لي غربه أقع القروش
قال لي لكن المشكله السعوديه دي حبايبنا كتار …😳😳
هنا ما قدرت …!!
فكيت الضحكة طوالي 😂
قلت لي إنت يالتجاني ماشي عقد عمل ولا عقد قران …
المهم قال لي لكن بيني وبينك بالله هو في أحلى من السودان دا ..!!
قول مشيت واغتربت وضيعت سنين هناك مش بكون ضيعتا أحلى سنين عمري ..المفروض اقضيها في بلدي …😳
( أنا ما قلت ليكم الزول دا خبير )
أها شوفو ( الزول ) دا هسا مشى ( الدوحة ) و ( الخُبر ) وجا راجع السودان في تلاته دقايق…
أنا كمان عشان ما يجدد عقدو دا
قلت لي اي والله مافي أحلى من البلد دي
قلت أقفل الموضوع دا ..
بتصدقو قال لي ينصر دينك يا ( علوب )
أنا ذاتي قلت كدا ..😳
وطوالي عمّر سلاحو وأطلق رصاصة الرحمة
قال لي بلقي عندك خمسة الف لي بكره 😎
( والله حسيت بيها ) ..
قلت لي ياخ إنت هسا يا ( التجاني ) بدل اللفة والتأشيرات دي ماتقول لي كدا من قبيل وتريحني وتريّح روحك
( قال لي داير أفتح شهيتك )…
ماعرفت اقول شنو والله …
أديتو الخمسة الف أعمل شنو
وداني تلاته دول …
الحمد لله التجاني صرف اول راتب كمغترب …..اقصد ( مُكتضِب )
المهم دا ( التجاني )
كدي إنتو بقيتو زينا واتعرفتو على الشخصية وعن قرب …
أها مره كدا قاعدين مع الشباب قام
( منتصر ) صاحبنا دا قال لينا والله اليومين ديل أنا عندي مشكله كبيرة ما عارف احلها كيف …!؟؟
قلنا لي خير يازول في شنو ..!!؟؟
قال عندو ود خالتو كدا عايز يتقدم ليهو لي بت لكن أهلها صعبين شوية هو ولد وحيد أخواتو بنات وأبو متوفي
عندو عمو واااحد لكن رمتالي كدا بِسكر من العصُر ومستحيل يسوقو معاهم ….!!
قال لينا نحن طبعاً ماشين معاهو
لكن دايرين لينا زول ( حناك ) كدا ومقنع
يمشي معانا ..يفتح الدرِب بس
( ود الحاجة ) قاعد مطرّف كدا قال لي
والله ديل إلا تسوق ليهم ( التجاني ) 👌
قالت بي هظار كدا …وبضحك ضحكتو
العجيبة ديك 🤣
لكن الجماعة أخدو ليهم ( صنة ) كدا
كأنو الفكره قد راقت لهم …💥
( إبراهيم )قال والله فكرة مالو …
على الأقل يعمل ليهو حاجه كويسه في حياتو ..
يازول ( الفكره ) زي لقت قبول عام كدا
( منتصر )ًذاتو عبر عن إرتياحو لانو بعرف
قدرات التجاني المهولة
أها( التجاني ) أصبح المرشح الاول لتولي
المنصب ..
قلنا ليهو نحن ما دايرنو يكضب عايزنو بس
يُحدث إختراق ويدي أهل العروس ديل
إحساس بالأمان ..
قالو لكن نقول ليهم جاي بي صفتو
شنو ….!!؟؟
( جعفر ) المجرم قال ليهم
( كضاب العريس )
فقعناها ليك ضحكة بأعلى صوت ..😂😂😂
المهم إتفقنا إنو ما نكضب نحن كمان
نعرّفو نقول الحقيقة يعني دا ( التجاني ) جارنا وجاي معانا …
هو بعد داك براهو بعرف طريقو للمرمى
المهم اكتملت الخطة وقابلنا ( التجاني ) أديناهو ( نفخة ) كدا إنك من كبارات الحلة ووجهاء القوم …
تسمع الحلة تقول ( منهاتن )
وقلنا لي عايزنك تمشي معانا تبييّض
وشنا و ( وش ) العريس ..وبنبيّضك
( الأخيرة دي ريحتو ) …
اخد لي ابتسامة خفيفة كدا ..وأدى وشو
فوطة ..وتهيأ للمهمة
وطبعا ترحيب حار منو بالفكره وطوالي دخل في الشخصيه
قال هو ذاتو ماعارف ليه دايما الناس
بتجيهو في الأزمات 😳😳
( سواها أزمات المبعوث الخاص للأمم المتحده ) دا …
المهم جاء اليوم الموعود ود خالة منتصر العريس دا إسمو ( مبارك )حدد المواعيد ونحن اخترنا الوفد الرسمي البتكون
مني أنا و ( منتصر ) و( جعفر ) و ( إبراهيم )
( ود الحاجه ) استبعدنا من التشكيله
كان سُقنا بضحك وبقِد الشُغل
و ( مبارك ) دا عندو ( خالو ) مسكييين كدا إسمو ( النقر )
أها دا الممثل الوحيد والمعتمد للعايله المالكة دي
ومعانا طبعاً المحتال ( التجاني ) كمراقب دولي ….!!
المهم إتجهزنا
والتجاني بالعمة والجلابيه والمركوب وشايل لي عصايه كدا فيها راس أسد 🦁
( نزل عدة الشغل كلها )
واتوكلنا مشيناً على الجماعة ديل …!!
دقينا الباب فتح لينا ( ولدم )
اتفضلو ..اتفضلو
دخلنا …
لاقانا أبوهم
زول ( وقور ) كدا لكن باين على ( قطيم ) يشيل ويعاين لينا …!!
وجا واحد كدا قالو دا عم العروس
( أقطم منو )
وأخوها ياهو الفتح لينا الباب دا فرفوش كدا غايتو يشيل ويبرِم في شعرو …
وواحد تاني معاهم ما عرفنا تبع منو …شكلو ( تمومة جرتق )
كل دقيقتين بتكلم في التلفون
ظاهر علي سمسار …
وبتكلم بي صوت عالي قال للزول البتكلم
معاهو في ( التلفون )
إذا ما جابت ( مية ) ولا تفكر تبيع
على الطلاق دا راسمالا
( الطلاق ذاتو بكون متحير )
خالف كراعو يدق في بطن رجلو دي بي يدو وماسك التلفون بالتانية ويورجغ …!!
إنتو دقة الرجل دي شنو كمان فينا …؟؟
تسخينه ( دلوكة ) ولا شنو ..
ومره مره يدي الطاقية شنقة كدا لي
قدام …!
( سمساري قاطع )
انتهت المكالمة قال والله ( الدولار ) ذاتو حيرنا …!!
غايتو جيب الجلابيه الشايفاها عيني دي ما أظن دخلو دولار ..💸
يحيرك في شنو …!! ؟؟
والله كان حيرنا ما عارف
غايتو لصيق شدبد في ( الأخدر )البتحرن 💵
( جعفر ) قرصني قال لي ( القرصان ) دا بكون بكوس لي في ( رهينة ) يتم معاهو شُغل …أعمل حسابك
قلت لي أفرض عايز يعمل كدا …
هو وينو الشُغل البتمو معانا …
جعفر ضحك لما سدا خشمو بي ( بلحة ) 😂
المهم يازول قعدنا
جابو لينا عصير كدا التجاني شفط لي شفطتين وقال كدا بدأ الهجوم …
والله عمل لي هجمة سريعة كدا في بداية اللقاء قربنا نصفق …👏
قال ليهم غايتو أنا ماعارف لكن البلد دي
لو ما النفوس نِضفت ما بتنضف ..
أبو العروس فك التكشيرة شويه كدا
وزي عجبو الكلام دا ..
( التجاني ) بكون لمح علامة الصلاة في وشو ودقن خفيفة كدا ( غمتو في الصندوق )
وطوالي واصل الهجوم ( من العمق المرة دي )
قال ليهم الناس ( توحد الله ) بس وتخلى البتعمل فيهو دا …الناس بعدت كتير ..
عاينت لي ( عم العروس ) لقيت الجلابيه قصيرة شوية ..
عرفت ( التجاني ) لعبا بالمقاس …!!
زولك لاعب ( مان تو مان )
يازول جماعتك الكلام دا ريحم شديد
وأحدث نوع من الانفتاح ،.
خاصة عمك ( عم العروس ) دا
لما جينا داخلين قال لي ود أخو الفتح لينا الباب دا ..
إنت ( تِفتك ) دي ناوي تحلقا متين …!!؟
قام ( أبو العروس ) وياهو أبو الولد دا
قال لي …والله أولاد الزمن دا غايتو الله يقدِرنا عليهم بس …
ما يدل إنو البيت فيه ( يمين) …
و( يمين متشدد ) و ( الوسط )
التجاني قرا أجواء المباره مبكراً
ولعب بالأجنحة ..
والحلاوة والبلح مرصوصات قدامنا ….
زولك ينقرِش ويوزع في الباصات
( التجاني مقدم عرض أسطوري )
واخيراً ( النقر جا )
( هييييع خال العريس )
ثم تنهد وقال
( والله ياجماعة نحن جايين في خير
وجايين طالبين النسب ..وولدنا ( مبارك ) دا طالب يد بتكم ( سمية )
بس كدا وسكت
( النقر ) بكون بحفظ في الكلام دا يومين
ويشيل ويطبق في يدينو ويعاين في الواطا
التقول رايحه لي نملة 🐜
دي الجملة الوحيدة القالا وطوالي
رجع فعّل ال ( mute ) ..
سرت لحظة من السكون ( أبو العريس ) دا
قال والله مرحب بيكم أول حاجه وطبعا
الزواج دا قسمة نصيب وربنا يسهِل …!!
التجاني طوالي ( رفع كورنه)
قال الناس مصعبنها بس المسأله أبسط من كدا كتير
( من ترضون دينه وخلقه فزوجوه )
نسى ( إن جاءكم ) لكن ما مشكله وصّل المعنى مشكور …
كتيرة منك يا ( راستا )
وواصل الخطبة قال وبالنسبة لي ولدنا
( المبارك ) دا
( زادوا ألف ولام لزوم الاجواء والتفخيم )
( شوف التجاني متألق كيف الليلة )
قال نشهد له بحسن الخُلق والدين 👌
و ( مبارك ) يتبسم ساااااي
( هو ذاتو إسمو مُساعد )
( عم العريس ) قال ودا الأهم …ربنا يسوي الفيها خير …قرب يهِز فينا
ويشيل ويعاين للتجاني وبكل بإعجاب
( ماعارف حاجه ساكت ) 😂😂
اللحظة دي آذان المغرب أذن
أعمامك ديل قطعوا الإرسال و قطعوا أي حاجه ونادوا على الصلاة …
طلعنا الحوش كل شي جاهز والأمور ظابته
صلينا غايتو التجاني كان ليهو مراد يقولو
ليهو قوم صلي بينا ..
حافظ ليهو تلاته سور …لكن بحب الزعامه
المهم صلينا يازول …
ا
وجماعتك قالو خير إن شاءالله بتشاورو
وبدونا رد …!!
وقال كدا ( التجاني ) اتنفض
( قفل واحتفل )
( قفلة معلمين لكن )
وقف طوالي على حيلو قال الفاتحة 🤲
( بي نهرة كدا )
أها يا اخوانا أدونا الإذن وبارك الله فيمن زار وخف
اللهم اجعله زواجا مباركاً وميسر
لحدي ما قرصنا بي تحت قلنا لي
شورة …شورة يا تجاني لسا
أنا المستغرب ليهو جاب المقولات دي من
وين !!؟؟
( والله مدرسة بالتجاني )
( أريتا مدرسة السواد ) 😂
وفعلاً الجماعة أدونا خاطرم وبوادر
إرتياح تبدو علي محياهم …
خاصة بعد الركعتين الصلاهم التجاني
بعد المغرب ديل وهي ( سنة مؤكدة )
( كدا كتير يا تجاني )
واكتر مما هو متوقع والله
دي أعمامك بكونو لاحظو ليها وش
بكونو حافظنها حفظ ..
التجاني غالبا ماعارفا شنو
ذكرني صاحبي كدا مرت قال لي في سؤال
داير اسأل ليهو لي زمان ياعلوب بس خجلان إنت ( القنوت ) دا شنو …!!
تجاني لعب مباراة كبيره ومهد الطريق
لي زواج مبارك …!!
و( مبارك ) العريس داير يطير من الفرح فقد مرت الأجواء بسلام ..
فعلا ( الموافقة الأمنيه ) جات بعد كم يوم
مبارك شحد الله والله أدا …والعرس رابعة العيد ..
يشهد الله لو كانو عملو شهادة بحث عن ( التجاني ) دا كان اترفضت …وغرمونا
غايتو الحاجه الكويسة (عم مبارك ) الطاشي داك زووول جاب خبرو مافي
حيكتشفو بعد العيد ..!!😂
بعد داك غايتو إلا يساعدو بالدعاء 😂😂
لكن عم العريس الشافتو عيني ديل كان لِحق لمن عرِف بقيم عليهو الحد بقيمو
ودون ادنى شك
زول ( مُر )
( بشبه جمال الدين الأفغاني )
المهم غايتو احتفلنا بالتجاني كما لم يحدث من قبل …وعصرنا ليهو الفيها النصيب …
الله يهديك ويهدينا يا مان
هو البكضبو شويه …!!
على الأقل انت كضباتك حدها
( الفتة ) دي …!!
( كعب الكضِب الكعب )
طبعا عرس مبارك دا ولا مفكرين نحضرو
بكون ( مشفر ) …حدنا العقد بس مع جماعتك ديل
مبروك يا مبارك رغم التسلل …!!
بيت مال وبنون 🥰
ال VAR قال قون ..!!