الطيب عبد الماجد يكتب : مأمون سوار الدهب .. الأغنية الغلط في المكان الغلط
قد أقدر حداثة التجربة بالنسبة لك وسوء التقدير لكنى لن اقدر بأي حال من الأحوال ما قدمته من خلال هذه المشاركة في هذه المحفل الإعلامي المعتبر من خلال مهرجان الإذاعة و التلفزيون في تونس عبر هذا الظهور ( غير المدروس )
و هذا شأن عام و ليس خاص
عشان كدا بكتب …
يا ( مأمون ) أعرف ما اعتمل في راسك أو من ( دلك ) على ذلك
وانت تشارك هذه التظاهرة بأنك تمثل السودان لذلك ستكون حريصاً بنقل تراث سوداني أصيل يمثلك ويمثل بلدك …!!
وسودانا فوق …ونحن الكرم ونحن الشهامة والكلام دا
( غلط ) …!!!!
في حاجه اسمها لكل مقام مقال
ولن نجد قريباً مثل هذا المقام الذي
أتيح لك ..
خمسة وعشرين عازف محترف قاعدين وراك …و كورال محترم …و نقل فضائي موصول و جمهور عربي يريد أن يقف على ملمح فني سوداني ….
تغني ليهو
البحلحل القلل الكبار الحاشاهو والله من القصار
دي بغنوها في ( قيدومة ) …!!
الطيب عبد الماجد يكتب : شوف يا صاحبي ….!!
أنا حاشا ان يكون قصدي ان أقسو عليك
لكن هذه مشاركة باسم الوطن ولن أجاملك
هذا ليس ب( إختيار ) ..هذه دراسة
لمعرفة انت ماشي لييي …!!وعاوز توصل شنو ..!؟ والهدف ذاتو شنو ..؟؟
وأود ان اعرف من الذي أشار لك بذلك ..!!؟
إذا كنت أنت براك كدا مجهود فردي ف( مصيبة ) واذا كانت جهات
ذات صلة فهي ( كارثة ) ….
دا مهرجان جامع المفترض تجتمع لجنه فيها فنانين وموسيقيين واصحاب رأي بقرروا شنو الأغنيات التي تتناسب مع هكذا مناسبة
وكيف يقدموا حاجه تشرفنا وتتسق ..!!
أنت موهوب وصوتك جميل وغناي وكل حاجه لكن لست مؤهل او دعني اخففها لك
لست من يقرر في ذلك ..
شوف يا محمد نحن بنعتز جداً بي تراثنا وهويتنا وغنانا ومحليتنا وتنوعنا وديل ياهم
نحنا …
وواحده من علامات تنوعنا دا عندنا أغنيات
كبيرة وكبيرة شديد في هكذا مناسبة انت مطالب بتقديم ما ينسجم منها مع الحدث …
غني ليهم يا ( مريا ) عشان يعرفوا أن الله حق وانو نحن ما عندنا سقف وبنغني اي حاجه اغنية كلمات وغناء سودانية
وإننا نغني ونحتفي بإرثنا وتراثنا بذات جمال إحتفالنا بالفن والموسيقى كقيمة جمالية يمكن للكل تذوقها ..!!
غني جيناك زي وزين لعبد القادر سالم وفضيلي جماع …فيها مسحة سباعي وعمق سوداني ..وواضحة وعميقة
قرِب المسافة
غني اغنية وطنيه ..!!غني اغنية لي كابلي
وردي …محمد الامين …
ما بالضرورة تحاكي هولاء الكبار غنيها
بي صوتك ودلالاتهم …
غني وطن الجدود ..
غني لحظة من وسن …تاخذ عني حزني
تأخذني ترجعني الي عيون وطني
عندها دلالة
غني ..
المهم اغنية مدروسة ..وكبيرة ومتفق عليها ..
الوراك ديل بعزفو أي حاجه
ماقمت بغنائه ياتي في الباب ( الطلاسم )
بالنسبة لمتلقي غير سوداني ..ولي البعض منا ..وحتى موسيقياً الأغنية رتيبة وما واضحة وماعندها مميزات
الأهم من كدا دي اغنية شتم ودلوكة
ماعايزة ليها مية عازف …
لما تدي اوركسترا زي دي لحن مفرط في المحلية التكرارية فهي تحاول مايعرف بالاستيعاب الاجتهادي
فيخرج العزف “عائماً” ومغترباً عن اللحن الأصل
فتفقد الأغنية روحها. وتفقد الأوركسترا قدرتها على إظهار جماليات التوزيع
ديل ممكن يعزفو ( قلنا ما ممكن تسافر ) يعزفو ( ذاك النهر يستلهم حسنا )
و ( سقت ورداً ) بعزفو ( أنا شاب أسمر )
عشان كدا هم ماعرفو الأغنية ولا عندهم
( نوتة ) لي اغنية زي دي
أدوك لحن ( عايم )كدا من عندهم
وإنت ( عُمتا )
كان يستوجب استغلال هذه القوة الموسيقية الضاربة في أعمال ذات عمق هارموني أو بناء لحني عريض عشان يظهر الجمال التعبيري للصوت وللموسيقى الاتنين مع بعض
حتى جماليات صوتك ما قدرت تطلعها
انت كان ممكن تغني اغنية مختارة بعناية
تطلع فيها وتنزل وتشغل كل امكانياتك
هذه المسالة لها تأثيرات اكبر من هذه
الدقائق التي قضيتها على المسرح …
انت عارف في ناس بياخدو انطباع كامل عن بلد من خلال أغنية بس …
يعني ( عمار الشريعي ) واحد من اكبر الموسيقين المصريين سالو عن موسيقي
بتلفت نظرو لم يتردد في انها موسيقى
( محمد الأمين ) الرجل دارس ومتمكن
وقرأ موسيقى ( الباشكاتب ) وماعندو طريقة غير يقول كدا …!!
والشريعي دا لما يقول راي موسيقي في مصر ..تاني ما في زول بقدر يتكلم
انت بتتذكر لما محمد الامين نفسو قال يا تغنو إنتو ولا اغني أنا …ولفت بيها الوسايط العربية كنوع من الضحكة كدا …
والسوداني لما يعصب …!! والزول ما عايز الناس تغني معاهو …ومثل هذه التعليقات السطحية
و كثيرون رجعو يشوفو هو دا منو هو ذاتو
؟؟
استمعو لمحمد الامين عرفو إنو دا غُنا
وموسيقي متعوب عليها …فسكتو ..
و وجدو له مبرر
حتى الأغاني التراثية لما تقدم في مهرجانات متخصصة تقدم كما هي شكلاً وموضوع ….!!
حتى لو اللجنة المنظمة اختارت الاغنية
ماهي اختارتها من قائمتك المقدمة
و بيني وبينك مش لانهم اعجبو بيها ..لا ابداً
لأنها الأسهل اعداداً بالنسبة ليهم
و خلاص انت ذاتك معجب بيها يسو ليك
شنو …
أنا بعرف كويس جداً ( دهاليز ) هذه المناسبات
هو انت ما حريص ..هم يحرصو لي شنو ..!!
قول ليهم داير اغني ( رحلت وجيت )
موسيقى ساكت كدا كان قدمتنا
( غنيت لي اخوك وخليت السودان كلو)
أنا بشوف إنك موهوب وصوتك جميل
و غناي ..وكلامي دا ليس انتقاص منك
و لا إمكانياتك لكن في مسائل كدا عندها علاقة ب ( العام ) شديد يصعب التغاضي
عنها عشان إذا شاركت تاني في اي مناسبة زي دي تستصحبها ..
و دعني أخفف من الحكم عليك في هذه القضية
إنت غني بس …!!
هذه المهمة في الاختيار من المفترض ان يطّلع بها آخرون يراعو كل الجوانب ما يتناسب معاك انت ذاتك وما ينسجم مع المناسبة ويتركو لك تجويد النص وغنائه
التمثيل الثقافي ليس مجرد رفع شعار المحلية بل هو كيفية تقديم هذه المحلية بلغة عالمية أو جامعة يفهمها الآخر ويحترمها ما أضاع فرصة ذهبية لترك انطباع يليق بمهابة الفن السوداني وعمقه
حظنا كدا ..!!
إن شاء الله الجايات
الطيب عبد الماجد
