الطيب عبد الماجد يكتب: عذبني و ( تحنن )

يوميات علوب …

عذبني و ( تحنن )

الطيب عبد الماجد

زمان كدا والبلد دي هااادية لاقيت لي واحدة في الشارع بأمانة كدا مفروض تكون معاها عربية نجدة 🚔 وموترين
واحد تشريفة 🏍️ والتاني من العين .🏍️
والله
قيامة وربطت …!!!
سماحة ( تفطِس )…

لا …والعيون ( صارنهن ) من الشمس …😔!!!

ديل لو لحقو لمن ( فكوهن ) بحصل ( كسوف ) ….
البت غرييييبة ….!!
( تتبروز وتتعلق بس مافي حل )

يازول طوالي قطرتها ليك …!!
قطر عجيب ….!!
قلتا طالما عجبتك ..!! وكسرتك ورضرضتك من حيث الشكل ياعلوب ….!! خش في المضمون
إمكن جاك النصيب ….!!!

( وجاك بحكي ليك …🎼 جاك يشكي ليك …🎼
من شوقو ليكا …جاك …!! 🎼)

المهم هي ماشا..!! و أنا ماشي …🚶🏼🚶🏼
وقفت …!! وقفتا …!!! 🕴️
لفت …!! لفيت…!! ↪️

قلتا بس أعرِّف عنها أي معلومة والباقي كلو هين ….!!
فجاة إتقشطت ليها في بيت كدا …!!! 😳
أنا هنا اتعوقتا واتعولقتا 😬
زي لما تكون بتحضر ليك في فيلم ومنسجم شديييد …!! فجأة الكهربا تقطع ..!!

هسا انا أسوي شنو …!!؟
انتظر ياربي ….!! 🤔
ولا أدق الباب دا اقول ليهم في واحدة دخلت هنا …دي منو ..!!!؟
ولا العمل شنو !!؟
إخترتا الانتظار ..!!
مافي غيرو …!!! وفِي الحراية دي …!! ☀️
هي لكن يا علوب يا الغبيان هسا لو طلع دا بيتم …!!
إنتا ما اتلحستا ….!! حتبيت هنا ولا شنو ….!!
طمنتا نفسي إنو ما أظن …!! لانو البت دي قاشرة قشرة ( صادر ) ..!! دا أصلو مابيتم …!!!
( المُنتج المحلي ) نحنا بنعرفو كويييس ….وتوب ( الجيران ) ما بيغبانا ….!!

المهم اتوكلتا انتظرتا ( متكل ) لي في كورنة كدا ذي بتاعين (المباحث ) لما يلبدو لي ناس ( الشيكات ) …!!
قعدتا لي في لستك ….!!!
ودي كانت أول مره أعرف فايدة اللساتك القديمة بتاعة العربات ( البغزغزو ) نصها في الواطا دي ….!! تلقاها موزعة في كل الأركان …اتاري لي نوع التكيلا دي ……!!
غايتو السودان دا فيهو المحن …!! بلد مبدع
( العجل شغال حي وميت …!!
إما تكيل ….!! ولا شايل طشت الغسيل …) …!!

ندعو كل الدول الأعضاء تجي تاخد ليها نقلة في ( تدوير ) النفايات ….!!
( تشوفنا بندورا كيف …!! لما راسا دا ذاتو يلف …..) 😇

اها وكت مرت زي نص ساعة كدا…!! بديت اتضايق….!! والشارع صاااني …!! والحر …!! 😰

بس ربك رب الخير جا الزول بتاع ( الدرداقة ) الببيع ( النواشف ) داك …!!
كاريها مستفا ليك لي عينا ( نبق ) و( دوم ) وفول وتسالي
دايرا توحل ….!! مع الكبكبي والترمس …!!!

( سوبر ماركت ( متدردق ) علي الأرض )

ويشيل ويكورك ….!! النببببببق الدوووووم 😱 عيش الريييف يا …!! 😱
والله كيفني ليك كيف خاصة لما يلوي خشمو ….!!
قلتا ليهو براحة…!!! خفتو يزعج ( الحمامة ) الجوه دي …!!
المهم جيت عليهو قلتا ليهو عندك شنو …!!؟؟
( السؤال الغبي ) …!!
( وناس كتاااار زيي كدا برضو بسألو …!! يعني ( حيكون عندو ( نوتيلا ) ماياهو الدوم واخوانو )

أديتو القروش قلتا ليهو ادينا من أي حاجة اتنين ….!! وهو شغال بعبي لي في الطلبات …!!
قلتا ليهو إنتو ( الدوم ) دا ( بتقشرو ) بي شنو…..!!!؟؟؟

( داير لي أي موضوع اتجرجر بيهو…!! واقطع بيهو الوكت …..!! لحدي ما القيامة دي تجي مارقة …) ..!!
قال لي بالمخرطة ….!!! 😳
داير أقع ….!!! دي دومه ولا ( دانة ) 🚀
….!!!
المهم ماخلي لي حاجه ود ظريف خلاص ومتعاون. …!! قلتا ليهو إنتا إسمك منو …!!؟
قال لي ( الرضي )
قلت ليهو اها إن شاءالله راضي …..!! قال الحمد لله في زحمة من النعم …!!
عليكم الله شوفو جنس ( الرضا ) دا …!!
واحدين نايمين هسا جوا البيت تحت المكيف تقول ليهو اها كيف الأحوال …!!؟ يقول ليك زهج شديد …!!

أها ( الرضي ) كمان أداني زيادة ( تسالي ) …..!!!
( عصرا لي زي الشحاد ) …!!!

( عرفتا إنو أي زول في الدنيا دي ممكن يدي )
وهل جزاء الاحسان إلا الاحسان …!!

واستعدل عربيتو ..عايز يفرتق ….
بس في اللحظة دي جاتني فكرة رهيييبة ….💥
قلتا أنا ما أخلي ( الرضي ) دا يكورك كدا إمكن يجي طرف خيت مارق كايس ليهو ( دوم ) ولا ( نبق ) ولا أي حاجه…ونستفسر ..

بس ناديتو ليك ب ( الجنبة ) كدا قلتا ليهو هاك يا ( الرضي )
دي متين جنية تاني ..!! بس عايزك تكورك لمن الله يغفر ليك ….!! البنات الفي البيت دا بحبن ( الدوم ) يكونن ما سمعن …!!!

قال لي ولا بدورنو ولا حاجه …!!

أنا بعرِفن …!!! 😳😳😳

هياااااا اخوانا …يا ما انت كريم يارب …!!! قال بعرفن …!!

( انا الحقيقة مما شفتو اتفائلت بي الولد دا ….!!! )
بسس …!! قلتا ليهو ….أول حاجة المتين جنيه دي ما بترجع …شيلا …!!
ولا تكورك ولا تعمل اي حاجه …!! بس وريني ديل منو هن ….!!؟؟؟
قال لي مابعرفن بالأسامي …!!! علا طوالي بجن يشترن مني
قلتا ليهو صغار ولا كبار…!!؟
قال لي صغاااار …!!!

( أصلو ما طمني ( الفقُر ) ….!!! ))
( يعني زولتي دي تكون جاية لي منو …!!؟؟ 🤔)

قلتا ليهو أصلو ماف بت كبيرة معاهن …!!؟
قال لي ماف …!!؟ تاني استدرك…!!
قال لي استغفر الله …!! صاح مره جات معاهم واحده كبيرة …!!!
اطمأنيت حبة …!! ولو ما خجلتا …داير أقول ليهو أها الجات معاهن دي حلوة …!!؟
تاني احترمت نفسي
قلتا ليهو خلاص يلا بعد دا كورك تاني …..!!
إنت ( كورك ) وأنا ذاتي ( بكورك ) معاك …..!! وقلنا كدا دورنا ….!!
هو يقول نبببببببق …!!! وانا اشيل ليك معاهو الدوووووووم ….!!! هو بهناك سمسمييييييه يا ……😱
وانا طوالي في نفس السِلِم فوليبيييييييه يا ….
يازووول مدورين ليك أنا والرضي دا باص وقون ….!!

بس ( قعونجات الخريف ) 🐸

زوووول جانا مارق مافي …..!!! قربنا شديد للباب ….!!!
ونكورك …!!! فضل لينا ندقو …..!!
قال لي ياخ ديل بحبو ( المنقة بي الشطة ) والليلة ماعندي …..!!
عليك الله شوف الود دا ….!!! 😳😳
قلتا ا ليهو الله ينعل يومك ياخ …!! داسي المعلومات الاساسية دي وحِسنا انقرش بالدوم …

بس بديت اكورك ليك ( منفرد المرة دي ) وبي أعلي صوت ….!!! المنققققققة بالشطة يا
ايووووا علينا جاي ….!!! المنققققة بي الشطة ….🥭🌶️
وزولك بس مندهش ومستغرب يعاين فيني ….!!! 😳

ونجح الكمين ….!!! والشرك قبض ….والبتين القالن جن طايرات …!!! شافعتين صغار كدا ( رقشات بس ) …!!

قلتا أصلو مافي مشكلة أول الغيث ( شافعة ) …!! والتقيل ورا ….
المهم الشافعات ديل ( ركّن ) ليك جنب ( الدرداقة ) الشعر متطاير ومنكش ويسألن ….!!!
وينا المنقة بي الشطة …!!؟؟ وينا ….!!؟
بي لهفة كدا لما شفقت عليهن …!!
و ( الرضي ) إتبكم …!! 😷

قلتا ليهم المنقة جاية شيلو الصبر …!!! وشيلو هسا من ( الدوم ) دا …!!
قالو لي لكن نحنا ما دايرين ( الدوم ) …!!
دايرين المنقة بالشطة ….!!

( البت الصغيرة شديد دي ريالتا زي سالت كدا ….!! 🥴

( طفولة شنو البي الشطة دي ياربي ….!!! ) 🤔
وأنا أقول نحن مالنا حارين كدا …!!
قلتا ليهم لا شيلو مجاني …!! شيلو أي حاجه من غير قروش عشان يتبسطن ويدونا أي معلومة عن الطيارة ( المختطفة ) جوه دي ….!!

إتخيل مش البنات ديل صغار كدا …!!! حسو إنو أنا زول حرامي ساكت وداير اختطفن
الزول البديهن من غير قروش دا ….!!

والله يا خوانا ختن ( كرعينن )ديل في نص راسن وقامن ليك صوووف …..!!! وفووووو …🏃🏻‍♀️🏃🏻‍♀️انقطعن في البيت ….!!! وكوووو رزعن الباب قفلو ….!!!
( أنا ذاتي بالغتا …)
بس شوية كدا الباب فتح …!!جات أمهم جارية لافحة توبا تشوف الزول الداير يدي بناتا ( الدوم ) ( والنبق ) …مجانا دا …!!! والمناسبة شنو …!!؟؟؟
لقتني ليك واقف ( النبق ) مع بتاع ( النبق ) …!!!

لمت ليك فيهو المسكين ..قالت ليهو إنت قلتا للبنات ديل شيلو النبق مجانا …!!؟
الود مسكين اتبكم وعيونو نططن …..!!
بس طوالي أنا أنبريت ليها …..قلتا ليها لا أبدآً هو ماعندو دخل ….!!! أنا الحقيقة اشتريت منو ..وجن بناتك الصغار ديل كايسات ( منقة بالشطة) …!! وكت ما لقن حسّيت بيهن زعلن كدا…!! قلتا أخفف عنهن …!!
بتعرفي ديل أطفال ما داير اكسر بي ( خاطرم ) ….!!!

( بي قلبي قلتا ليها ديل ما أطفال ديل نسوان بتوحمن …!! )

فقلتا ليهم خلاص شيلو أي حاجه تعجبكم …!!!
والحقيقة أنا أعتبرتهم يعني زي بنات أخواتي وواحد ….!!!
( مشاعر كان سمعتني الليلة كان زغردت عرس وولادة في ضربة مزدرجة ….!!! دي كان دمرتا دمار …..)

يازووول الثقة …!! ورصريص الكلام …!! والوش ….المرا اقتنعت وبردت حبة كدا …!!! قالت لي كتر خيرك ….!!! بس كمان أنا اتخلعتا لمن جن قالن لي كدا ….!!
الدنيا بقت صعبة زي ما إنتا عارف …!!؟؟
قلتا ليها معاك مليون حق …!! وعجبتيني جدا لما جيتي بي نفسك تستفسري …!! دا سلوك مسؤول أحييك عليهو ….!! ( بقيت مرشد اجتماعي لما اتكيفت من نفسي مفروض أواصل… )

قلتا ليها وهسا أنا ما ماشي من هنا مالم تجيبي لي البنات ديل أطبطب عليهن واطيب خاطرن ….!!!
إنت عارفا المسائل دي ممكن تعمل ليهن عُقّد …!!

( بي قلبي قلت ليها طالما ما بضربن في ( الشطة ) دي عقدة واحدة بتجيهن مافي …!!! )

قالت لي خلاص ولا يهمك بكلمن …!! وأنا كمان إصرار شديد لااازم يجن …!! ما صدقنا لقينا طرف خيط لي ( الإيرباص ) الراكا جوه دي …!! ✈️
قربتا اقول ليها وجيبي معاك البيت كلو …!!

فعلا جابو لي الشافعتين المنكشات ديل …!! يازول قعدتا معاهن في الواطا دي …!!! قلتا ليهم أنا جاركم هنا وأنا زي ( خالو ) اتفقنا …!! وطيبتا عليهن ….!!
أنا قايلن زي ( الشفع ) يقومن يخجلن كدا ويدنقرن في الأرض ويغلبن الكلام ..!!
وخابت كل توقعاتي…!!
أول حاجة الصغيرة المجرمة دي أدت ( نخرتا )حكة كدا ….وقالت لي المنقة …!! 🥭المنقة بي الشطة …!وينا .!!!؟

( البت دي مُدمنة )

والمرا كمان احتفالًا بموقفي العظيم دا جابت لي موية ..!! شلتها عايز أشرب شميت لي فيها ريحة ( محلبية ) كدا …!!
عاينتا لقيت أثر ( حنة ) في الكباية …..!!
أها وكت شافتني بعاين كدا …!! اعتذرت قالت لي معليش أصلا أنا ( بحنِن ) النسوان ودي ( حنة ) الفي الكباية دي ….!!!
بس في اللحظة دي ( الطيارة ) ست الرصه دي كلها …!!جات مارقه ….!! 🛫
أنا داير أقع من طولي ….!!
( محننة ) فُل …!! 🙌 ….!! بي نقشتا …!!! 🎼
وعربية جاتا وقفت جنب الباب …!!!

ودعت ( المرا )أم الشافعات …! وغمتت ليها قروشا في يدها …!!!
المرا قالت ليها شكرًا يا ( أماني ) وسلمت علي الزول الجاها بالعربية دا من بعيد كدا ….!! قالت ليهو ( مصطفي ) ازييك ….

( وأنا بشفط في الموية بي حِنتا ) ….!!

قلت ليها آيوا شايف الزباين …!!
قالت لي أيوه دي زبونتي ….مرا لطيفة خلاص …!! ومصطفي دا راجلا …شغال في الجيش …!!
رتبة كدا …!!!

في اللحظة دي …بخخخخخخ بخيت ليك الموية من خشمي …!! 🤧
الله دا ماشافني الليلة رغم غرضي الشريف دا …!!!

أم الشافعات اقتنعت ….!!! الكان بقنع لي أب ( طبنجة ) دا شنو .!؟؟

قلت ليها عليك الله جيبي لي كباية تاني …!!
ولا اقول ليك …!! جيبي جك ….!! جك كبيييير عليك الله
بس دخلت تجيبو لي …!!

كوركتا ليها تاني …قلتا ليها ما مشكلة لو (محنن ) جيبي …!!

ولا أقول ليك ( حنني وجيبي ) والليلة ساير …

ياهو حظنا وياهو حالنا وياهو رمادنا ….طلعت بي راجلا …( أماني ) ..

ياربي ( مصطفي ) دا بكون في سلاح ( الأغاني ) 🤔

إتلفتا علي ( الرضي ) بتاع الدرداقة قلتا ليهو …..!! الدوووووووم
ماعارفو فِهّم الحاصل ولا الحاصل شنو لأنو ردا علي قال
لي ….!! النبق النبق النبق …!!!
يكون عرفني ( المجرم ) …!!!

غايتو يا ( مصطفى ) جنس حظ

طبنجة…!! وكمنجة ….!!!🎻

صحي يا ( أماني )