وفاة بابكر حامد ود الجبل أشهر رجل أعمال سوداني حسبما أفادت مصادر صحفية و مقربون من الرجل .

وذكرت المصادر ان رجل الاعمال توفى بدولة الاردن عقب سفره في رحلة استشفاء ، وانتقل الى رحمة الله فجر اليوم السبت .

انا لله وانا اليه راجعون وشبكة سودافاكس تعذي الشعب السوداني وذوي الفقيد ،وهو احد رموز العمل الخيري في البلاد .

ود الجبل : ثروتي بدأت بـ (3) قروش فقط وكنت أفرش بضاعتي على الأرض.. واتجول بالحمار..!

حاوره: خالد ساتي

* ود الجبل.. ده اسم ولا لقب.. وجا من وين؟
– أنا اسمي الحقيقي (بابكر حامد موسى)، وود الجبل دي جات من مكان مولدي (جبيل الطينة) بمنطقة الجموعية.. ومن هنا جاءت تسمية ود الجبل.
* طيب.. كلمنا عن نشأتك.. وأسرتك.. وطفولتك..؟!
– أنا من أسرة بسيطة جداً.. ووالدي كان تاجر تقليدي.. وكان يملك البهائم والضأن والابل.. وأنا حاولت أتعلم التجارة بعيداً عن والدي.. وبدأت منذ صغري التجارة بالحمار.. كنت أجمع البيض والحمام والجداد ثم أبيعه في أم درمان.. ومن أم درمان كنت اشتري بعض الأشياء الصغيرة وأبيعها في الحلة.. وهكذا كانت البداية إلى أن أصبحت تاجراً متجولاً بهذا الحمار وحمت في كل مناطق الجموعية.. أبيع وأشتري.. الطماطم والليمون وقصب السكر.. وغير ذلك ثم بدأت (أفرش) البضاعة في الأسواق.. وتوسعت في التجارة فأدخلت (العدة) الكبابي والصواني.. وفي سنة 65 نقلت تجارتي إلى (ميدان الأمم المتحدة).. برضو فرشته في الواطة.. لكن ناس البلدية ضايقونا.. فمشيت عملته بقالة جنب مقابر فاروق.. والبقالة بقت بقالتين.. الكلام ده كان في السبعينيات.. ولمن فتحوا صرافات العملة دخلت المجال ده وعملتها صرافة.. لكن حصلت مشاكل وقفلوا الصرافات.. فرجعت لتجارتي العادية تاني.. وبعد كم وسبعين سجلت شركة (بابكو) للتجارة والمقاولات.. وأصبحت أحد المستوردين.. ولحبي لاسم ود الجبل.. أنشأت شركة (ود الجبل التجارية)..
* كدي كلمنا أكتر عن تجارة العملة؟!
– والله الوقت داك الموضوع ده كان جايط شويه.. ما عندنا صرافة مسجلة يقبضونا.. عندنا صرافة مسجلة برضو يقبضونا.. وفي يوم مشيت وقابلت السيد الصادق المهدي.. وقلت ليهو الحكاية شنو.. كل مرة قابضني.. رغم اني خليت حكاية تجارة العملة دي.. وقلت ليهو أنا بطالب بوجود بوليس معاي محل ما أمشي.. اذا لقيتوني بشتغل عملة اقبضوني..
لكن القبض ساي ده أنا برفضو.. قام السيد الصادق قال لي: إنت يا ود الجبل بقيت زي أبو نفاش.. أي نكتة كان قالها ولا ما قالها ينسبوها ليهو.. أها.. والناس ديل الظاهر شاغلين معاك كده.. عموماً إن شاء الله طول ما أنت في السليم ما بتجيك عوجة..
وفعلاً كتب مذكرة للسيد مبارك الفاضل وقال ليهو إنو ود الجبل ده أنا وثقت فيهو وبقى ما ليهو علاقة بالعملة!!.
* وصحي ما جات عوجة تاني؟!
– والله أبداً.. ما حصل قبضوني تاني.. الا بعد الانقاذ ما جات وده كان شيء تحوطي ساي ولمن عرفو انو انا ما لي علاقة بشغلانية العملة دي اطلقوا سراحي.. والانقاذ دي عملت حاجة مهمة جداً في رأيي.. وهي انها نجحت في تحجيم الدولار وانهت السوق الأسود!!.
* وفعلاً من الوقت داك خليت تجارة العملة؟
– آي والله.. لكن الناس برضو ما خلوني في حالي.. وطلعوا فيني اشاعة زعلتني جداً.. قالوا انو ود الجبل ده الحكومة بقت ما بتسألوا لأنو شغال معاها وبوريها الناس البتاجروا في العملة عشان يقبضوهم.. والاشاعة دي زعلتني جداً.. وده كلام أبداًما صاح.. وأنا عمري ما وشيت بزول!!.
* واشتغلت شنو طيب بعد حكاية العملة دي؟
– في التجارة.. أبيع وأشتري.. مرة عدس.. مرة بصل.. المهم اشتغلت لحدي ما بقى عندي قروش كويسة.. خاصة في مجال العقارات.. وكان عندي قروش عند ناس الحكومة وقالوا لي قروشك دي نحن ممكن نديك ليها أراضي وفعلاً استلمت قطع وخليتها لحدي ما أسعارها ارتفعت وبالطريقة دي زاد رأس مالي.. بس عاوز أضيف حاجة مهمة وهي إنو في اشاعات طلعت عني وهي إنو أنا برهن بيوت الناس البستلفوا مني قروش وبعدين بشيل بيوتهم.. والله.. والله.. والله ما حصل عملت الحاجة دي أبداً.. ومرة واحدة بس في حياتي جا الزول المديون وقال لي شيل البيت المرهون لأنو ما عندو طريقة أبداً يدفع.. وهذا ما كان.. لكن غير
كده يشهد الله أني ما أخذت بيت مرهون..

* إنت يا ود الجبل بتتعامل كيف مع ناس السوق؟
– أنا زول دوغري جداً.. وأي زول بعرفوا في السوق طلب مني مساعدة ما بتأخر.. لكن ما بحب اللف والدوران.. يعني كان قال لي بسلم قروشك يوم كذا.. وما أوفى بوعدو بزعل شديد وممكن أقاضيهو.. عشان كده بقول للزول ما تحدد تاريخ ساي وبعدين تنط.. لازم مواعيدك تكون في محلها. وإلا ما تلومني.. وأنا طبعاً بقدر أحوال الناس وظروف السوق عشان
ما يقبضوا على زول إلا اذا حاول ما يكون صريح معاي!
* يقولوا إنك ما درسته خالص؟
– أنا قريت الخلوة.. وقريت سنة أولى.. يعني بقرأ بسيط كده.. لكن هسي أمشي جيب آلة حاسبة وأي رقم تقولوا بضربوا في رأسي وبقولوا ليك..
* ما حاسي بالندم إنك ما واصلته قرايتك؟
– طبعاً ندمان جداً.. لكن زمان والدنا كان راجل بتاع زراعة وصعب جداً.. قام مرة جاب
لي جواب وقال لي اقرأ ولمن ما عرفته ضربني ضرب شديد.. كرهت المدرسة.. وخليتها.. لكن وأنا كبير كده حاولت براي أتعلم القراية.. والحمد لله (الحساب) ده أنا شايف روحي فيهو شاطر جداً.. وده ذاتو علم يعني.
* علاقتك بناس بيتك في طفولتك كانت كيف؟
– أبوي كان متزوج عشرة نسوان وفي حبلو أربعة نسوان.. ونحن كنا ولدين وبنتين من أمنا وأبونا.. غير أولاد الأبو.. وأنا مدين لأبوي إنو غرس فيني الوضوح والأمانة.. أما أمي فهي كانت نبع الحنان بالنسبة لي.. وأنا والله زول حنين شديد ودي ورثتها من أمي.
* دلعوك؟
– أبوي كان صعب.. لكن أمي ما قصرت معاي.. لو قلت ليها ختي سكر في ملاح الويكة كانت بتسويوا.. كانت بتحبني شديد.. وحاسه إنو أنا حاكون زول كويس.. الله يرحمها.
* كنت متخيل إنك تكون في يوم من الأيام ود الجبل العندو القروش دي كلها؟
– أبداً.. لكن شوية شوية.. بديت أفهم إنو أنا ممكن أطور نفسي.. وده يحتاج لذكاء.. وتوفيق من ربنا.
* أول مبلغ استلمتوا في يدك كان كم؟
– أول مبلغ كان «3» قروش واشتريت بيهو ليمون وبعتو..!
* الـ «3» قروش دي جبتها من وين؟
– من شغلي في السوق.
* وبعدين؟!
– شوية شوية بقيت «15» قرش وطوالي قمت اشتريت بيها الحمار؟!
* وأول مليون كان متين؟!
– بعد كم وسبعين استلمت أول مليون.. في يدي.
* بصراحة يا ود الجبل ثروتك دي هسي تقدر بكم؟
– ده شيء بيني وبين ربنا بس.. أنا ممكن أقول ليك عندي عشرة مليار والناس يمكن تقول مائة مليار.. أنا بخلي أي زول يخمن.. بس
الحمد لله أنا فعلاً وضعي كويس.. وقروشي كتيرة وما في تاجر يوري راس مالو كم.
* طيب علاقتك كيف مع الناس العندها قروش.. زي صلاح إدريس وجمال الوالي.. وصلاح القاضي.. وود القبائل وود المشرف والكاردينال؟.
– نحن لمن جينا السوق لقينا تجار معروفين بدوا قبلنا أو معانا.. منهم النفيدي وناس شركة كوفتي.. لكن ناس صلاح إدريس وجمال الوالي فديل ظهور متأخر شوية.. وبتربطني بيهم علاقة طيبة.. وأحياناً في تعاملات..
* طيب.. ناس صديق ودعة وآدم يعقوب وابن عمر؟!
– ديل ما لمتنا معاهم تجارة ولا شغل سوق.. وابن عمر ده أنا بالصدفة بعت ليه بيوت.. وبعد داك جاني وقال لي أنا عندي قروش عاوزك تمسكها لي ولمن مات كان عندو في ذمتي (175) ألف دولار مسجلة في الدفتر، ورغم إنو ورقة تثبت الكلام ده ما كانت في.. لكن بعدما الراجل مات كلمت طوالي الورثة وقلت ليهم أعملوا لجنة وتعالوا استلموا قروشو الكان خاتيها عندي.. ومشيت في المحكمة وكتبت الشيكات وسلمتها ليهم.. أما صديق ودعة فكانت بيناتنا معاملة بتاعت بيع وشراء عقارات، وكان طالبني شوية قروش ورجعتها ليهو وبعد داك وقفت التعامل معاهو.. وأنا والله علاقتي بالمجموعة دي بس في الإطار ده لأنو هم ما تجار زينا في السوق..!
* في ناس في السوق من التجار المعروفين إنت طالبهم قروش؟!
– كتار.. أنا عاوز مليارات من بعضهم.. وللأسف جزء منهم الآن هم في السجن.
* وتاني يا ود الجبل؟!
– والله أنا في حاجة عاوز أقولها.. أنا زول مواظب جداً على الزكاة من ما بديت في التجارة دي.. ومش بزكي بس.. يشهد الله إنو أنا مواظب على التصدق.. وده سر إنو تجارتي ماشة في زيادة.. والحمد لله.

تعليق بواسطة فيسبوك

التعليقات

اترك رد وناقش الاخرين