قصة وتاريخ..كاس العالم ( أموي)..أكبر ( ريمونتادا ) في التاريخ

قصة وتاريخ
كاس العالم ( أموي)
أكبر ( ريمونتادا ) في التاريخ ..
( عبد الملك بن مروان X جرير بن عطية )
وهذه أضخم عملية إختراق دبلوماسي وإعلامي تحدث داخل قصر الخلافة في ( دمشق )
أطرافا منو ..!!؟

خليفة الأمويين ( عبد الملك بن مروان ) و( الحجاج بن يوسف ) والي الخليفة في ( العراق )
ونجم الشباك وقتها الشاعر المهول
( جرير بن عطية )
أعظم من هجا وارقّ من تغزّل وأكبر من مدح …
( مجموعة الموت )
( جرير ) دا كان داير يدخل القصر الأموي بأي طريقة بعد ان تمطى وتجلى في العراق
عايز يمشي ( كاس العالم )
كان الوحيد البقدر على الحجاج بكل جبروته وعنفوانه
بديهو بيتين شعر بخلي بين السما والواطا

الطيب عبد الماجد يكتب: عذبني و ( تحنن )

الطيب عبد الماجد يكتب: الكأس إسباني

أها ( جرير ) كلّم ( الحجاج ) في الموضوع دا والحجاج رحّب …!!
( بيت وااااحد من جرير دا بوديك السما
وبيت منو بنتهي منك )
والحجاج كان بيقدّر اللعبة الحلوة
وعارف إنو نظام ( بني أمية ) محتاج لمنصات إعلامية قوية وأقلام ولسان فصيح يثبّت أركان الدولة ويقصف جبهات الخصوم ..
( ومن لها سوى جرير )
المشكله ماهنا
المشكلة إنو ( جرير ) دا ملفو الأمني والسياسي كعب شديد
( مشبوه ) في نظر المخابرات الأموية
أول حاجه الزول دا من ( مُضَر)
( الضفة التانيه ) وديل كانو واقفين ألف أحمر مع ( عبد الله بن الزبير ) في مكة ضد الأمويين
إذن جرير مصنف ( معارضة ) راسو عديل
ماعندو أي طريقة يتحاوم بي هنا
لكن ( الحجاج بن يوسف ) داعمو …!!
وقرر يرمي بكل ثقله السياسي والعسكري عشان يفك الـ “Block” بتاع جرير دا في القصر الدمشقي
ماعمل تزكية عادية ولا كلم الخليفة من بعيد ….
رسل ليهو وفد عديييل وبقيادة ولدو شخصياً ( محمد بن الحجاج )
وفعلاً وصل الوفد إلى هناك فانفتحت أبواب القصر الأموي المنيع ….!!

ودخل ( جرير )
لكن ( عبد الملك بن مروان ) ( بعاتي ) كبير وثعلب سياسة
حبّ يعمل لجرير حظر بس ( برستيج ) واختبار نفسي قاسي كدا عشان يكسر ( المضرّي ) ويحسسو بالضعف ..
( الناس ديل ما بفوتو الفرص الزي دي )
أها أول ما دخلوا
الخليفة عمل روحو ما شايف ( جرير ) دا ذاتو واتجاهلو تماماً واتلفت لولد الحجاج محمد دا
وقال ليهو ودا منو كمان المعاكم دا ..!؟؟
وهو عارفو كويس جداً
فقال إبن الحجاج ..

هذا ( جرير ) شاعر العراق الضخم وهو ببابك منذ أيام
هنا الخليفة إتلفت على ( جرير ) ورمى ليهو ( باص ) خشن كدا مقتبسا ً أحد أبياته في الغزل وقال ليهو باستهزاء
مش دا إنت البتبكي على الأطلال
والله لا أرى لك عندي شيئاً!
( والظاهر من هنا جات عبارة
( ماعندي ليك شي ) دي …!!😂
( شوف ( مغارز ) الملوك قوية كيف ) …

لكن ليي ( عبد الملك بن مروان ) دقّ جرير بالبيت دا رغم إنو بيت فصيح وبليغ ..🤔
( عبد الملك ) عايز يقول لي ( جرير )
إنت هسا جاييني (مخمخم ) كدا في قصر الخلافة في ( دمشق ) وواقف قدام هيبة الدولة الأموية وقضيتك الأساسية جاي تبكى وتتباكى على “حبال الغرام” ومحبوبة رحلت؟
كايس ليهو فيهو فرصة ..
قال لي …أهذا هو شاعر العراق الفحل الذي أرسله الحجاج ليمدح الخلافة؟
( جرير في فتيل )
زولك دخل في امراً ضيّق
والقصر كلو ساكت ومنتظر يشوف
( جرير ) حيعمل شنو تحت هذا الضغط النفسي الرهيب
جرير ثبت …!!! وختا الكورة واطا
وقدِر يمتص الصدمة بذكاء وكبرياء
واستأذن الخليفة أن يُنشد
( ديل ناس ( مضر ) كمان …أسياد البيان
وأسياد الكلام …وأسياد الشي ذاتو ) ✋
فأُذن له بالإقلاع …
أول حاجة ما بدأ بالهجوم أو المدح المباشر طوالي ….جدع ليهو ( باص )حنين كدا يلطف بيهو الأجوآء ويعمل بيهو اختراق ويهدّي اللعب
( زولك عارف كويس جداً مزاج القصر )
فابتدر بأرق وأجمل قصيدة غزل في تاريخ العرب حيث أنشد بصوت هزّ الرخام الملكي
إنّ العُيونَ الَّتي في طَرفِها حَوَرٌ
قَتَلنَنا ثُمَّ لَم يُحيِينَ قَتلانا
يَصرَعنَ ذا اللُبَّ حَتّى لا حِراكَ بِهِ

وَهُنَّ أَضعَفُ خَلقِ اللَهِ أَركانا
لا لا لا لا لا كتير كدا يا جرير 🙌
القصر وقف ( النبق ) ..!!😳
الخليفة ذاتو عيونو رقرقن من الرقة والجمال الطالع من الزول دا ..
( البيت قاتل صراحة ) 💞
ويُصنف ضمن ال ( 5 Top ) في الغزل العربي عبر التاريخ لو ماكان الأول
زولك ( جرير ) وكت لقى الأرضية بقت جاهزة والمزاج السلطاني اتدوزن والملعب كلو في يدو …
بدا اللعب الصحي صحي …
هاجم بالأطراف …وجا من العُمق
وطوالي قلب الطاولة نحو الهدف الاستراتيجي وضرب ضربتو القاضية والدبلوماسية الأشد ذكاءاً في تاريخ المدح السياسي
إستعدل كدا وعاين للخليفة دا جوه عينو فخراً وعزة
وقال كدا دوّر
أول حاجه بدا يشكي حالتو

قال للخليفة
تَعَــزَّتْ أُمُّ حَــزْرَةَ ثُــمَّ قَـالَتْ
رَأَيْـتُ الْـوَارِدِينَ ذَوِي امْتِنَـاحِ
تُعَلِّــلُ وَهْــيَ ســَاغِبَةٌ بَنِيهَـا
بِأَنْفَــاسٍ مِـنَ الشـَّبِمِ الْقَـرَاحِ
( أم حزرة ) دي ( مرتو )،المعنى يعني تشكو الفقر رغم عزتهم ….!!
وأردف ( جرير )
ثِقِــي بِـاللَّهِ لَيْـسَ لَـهُ شـَرِيكٌ
وَمِـنْ عِنْـدِ الْخَلِيفَـةِ بِالنَّجَـاحِ
يعني يا ( أم حزره ) ما تشيلي هم
وثقي في ربنا طالما هو ماشي على الخليفة فالموضوع دا منتهي الزول دا ( بجيّهنا ) تب ..
شوف ( جرير ) الثعلب سايق ليك
( عبد الملك ) كيف ..!!؟
وبالدقداق
وقال كدا عمل التفاف ال ( F16 ) 🛩️
ما بتعملو
جا نازل في الخليفة أرض جو
ورمى البيت الإجمع عليهو معظم النقاد واعتبروه أمدح بيت قالته العرب …
قال ليهو

أَلَستُم خَيرَ مَن رَكِبَ المَطايا ..
وَأَندى العالَمينَ بُطونَ راحِ؟”
لا لا يا ( جرير ) ياخ
براحة علينا وعلى ( عبد الملك ) وعلى بني أمية كلها ..
ختاها في ( المقص )جرير ….
الزاويه البسكن الفيها الشيطان
شوف الزول دا ( مجرم ) كيف
قال لي عديل كدا إنت الأول
مافي زول أرجل منك ومافي زول أكرم منك
( قفلا طرشا )
أصلو ( الشجاعة ) ولا ( الكرم ) أي واحدة من ديل بتكتل أي عربي وقتها
( جرير ) خماهن الاتنين جابن على جناح بيت من ( ذهب )
واسقطهم على ( عبد الملك بن مروان )

وعقّب الكبير
لَكُـمْ شـُمُّ الْجِبَـالِ مِنَ الرَّوَاسِي
وَأَعْظَــمُ سـَيْلِ مُعْتَلِـجِ الْبِطَـاحِ
دَعَــوْتَ الْمُلْحِـدِينَ أَبَـا خُبَيْـبٍ
جِمَاحـاً هَـلْ شـُفِيتَ مِـنَ الْجِمَاحِ
( جرير ولّع ) 🔥
دمر الخليفة دمار انتهى منو كلو كلو
( عبد الملك بن مروان ) راح في
حق الله
البيت دا شال الخليفة الأموي من الكرسي
وداهو السما
شوف ( جرير ) دخل المباراة دي وهو متأخر بهدف

وتلقى ضربة قوية في بداية الشوط الثاني بـ “مغرز” عبد الملك البارد وهجومه على بيته الغزلي الباكي
لكن جرير قرر يلعب “الريمونتادا” التاريخية
هدّى اللعب بالعيون التي في طرفها حوّر
والهجمة المرتدة السريعة
بي ( ألستم خير من ركب المطايا؟
وهدف في الدقيقة 90
( وأندى العالمين بطون راح )
هدف أسطوري قاتل
والتفت ( عبد الملك ) لجرير وقال له
بانتشاء وفخر بلى يا جرير.. نحن كذلك!
( النفخ دا كمان بودي المنفوخ في حتة تانيه )
قال لي ( بلى ) ..😂😂 بتصدقو ..ولا دساها
شوف الثقة دي …!!
( شُغل ملوك كمان …تحسبو لعب )
( قفل واحتفل ) 🎉

وقال ( عبد الملك ) أمام الناس
( من مدّحنا منكم فليمدحنا بمثل ما قال ( جرير ) أو فليسكت )
( أمسسسك ) 😳
( لقد اتعبت من جاء بعدك يا جرير )
( ود عطية قفل الطبلون )
طبعا الخليفة كان عندو ( الأخطل ) أخطر شعراء العرب
لكن ( جرير ) مسح بيهو البلاط الملكي
المفارقة إنو المواجهة دي ما كانت بين ( غريب ) و ( قريب )
هي في الأصل معركة داخل البيت المضرّي الواحد يعني ديربي أولاد عمومة
( عبد الملك بن مروان ) و( جرير بن عطية ) ديل أولا عم جدهم واحد
ياهو ( مُضَر ) دا وكلهم قرشيين
( مُضَر بن منذر )
بس ديل ( قرشيين عدنان ) وناس جرير
( بني تميم )
( حديد لاقى حديد )

صراع هوية بس جوه البيت الواحد ما أكتر
ناس ( عبد الملك بن مروان ) يمثلوا
( مُضَر ) السلطة والدولة والحُكم
التي كانت تريد بسط سلطانها وسيطرتها
وناس ( جرير ) ( مُضَر ) البادية والفروسية والمنصات الإعلامية والشعرية الكانت بتميل للمعارضة الزبيرية …!!
وكلو مؤثر على الأرض
ناس ( جرير ) هم ( السوشيال ميديا )
والتلفزيون والصحافة والراي العام
وناس ( عبد الملك ) الحكم والقوة والنفوذ
كل واحد كايس التاني ومحتاج ليهو
( سيف وقلم )

عشان كدا الحجاج استبسل في وصول
( ميسي ) دا
وأمر الخليفة ( عبد الملك بن مروان ) فوراً بمئة ناقة من الإبل الثمينة ….🐪🐪🐪لجرير
( جرير ) شدة الله ما ادا
قال ليهو لكن يا الخليفة أنا بقيت
راجل كبير ( الإبل ) ديل كان جفلن بجيبن كيف ..؟؟
( بكون كان داير يبدلوها لي بي ( دولارات ) 😅@
فأمر الخليفة له بثمانيه من الرعاة
وأغدق عليه من العطايا …
شوف القوة دي
( بيت شعر واحد هزّ القصر الملكي )
( جرير ) جا ( مجرجر ) رجلينو ورجع على راس مئة ناقة من الغوالي بي رواعيهم والعطايا 🎁
بختك يا ( أم حزرة ) ( جرير ) غاب وجاب
وإن من البيان لسحرا …!!
ونلتقي في قصة أخرى بمشيئة الله